Isroil 16-martdan boshlab barcha mamlakatlar bilan ikki tomonlama aviaqatnovlarni tiklaydi. Bu haqda mamlakat TIV matbuot xizmatiga tayanib, “RBK” xabar berdi.
Foto: EPA
“Ertadan boshlab Isroilga borish va kelish yo‘lovchi aviaqatnovlari yo‘nalishidagi cheklovlar bekor qilinadi”, — deyiladi vazirlik bayonotida.
Biroq bir qator cheklovlar o‘z kuchida qoladi, jumladan, kelayotgan reyslar soni kuniga 3 ming kishilik kvotaga muvofiq cheklanadi, aeroportda ijtimoiy masofani saqlash qoidalari saqlab qolinadi va yo‘lovchilar koronavirus infeksiyasi bo‘yicha tekshiruvdan o‘tkaziladi. Bundan tashqari, Isroil Sog‘liqni saqlash vazirligi aholi sog‘lig‘iga zarar yetkazishi mumkin bo‘lgan har qanday parvozni bekor qilish huquqini o‘zida saqlab qoldi.
Avvalroq ommaviy vaksinatsiya munosabati bilan Isroil koronavirus yuzasidan o‘rnatilgan cheklovlarni yumshatgan edi. Shu tarzda 8-martdan boshlab ayrim toifadagi chet elliklarga mamlakatga kirish uchun ruxsat berildi va isroilliklarning uyiga qaytishi uchun qo‘yilgan taqiqlar ham bekor qilindi.
Isroil koronavirusga qarshi emlash bo‘yicha dunyoda yetakchi hisoblanadi. Bloomberg ma’lumotiga ko‘ra, mamlakat aholisi 9,2 million dozada emlangan va o‘rtacha 100 aholiga 102,63 doza vaksina to‘g‘ri keladi. Taqqoslash uchun, Qo‘shma Shtatlarda har 100 kishiga 32,25, Rossiyada esa 5,11 dozadan vaksina to‘g‘ri keladi.
Avvalroq COVID-19’ga qarshi tezkor va samarali emlash kampaniyasi sharofati bilan Isroil dunyoda virusni yenggan birinchi mamlakatga aylangani haqida xabar berilgandi.
Shuningdek, Birlashgan Arab Amirliklari (BAA) koronavirusga qarshi ommaviy immunitetga erishgan birinchi mamlakat bo‘lishi mumkinligi, chunki aholining katta qismi virusga qarshi emlanib bo‘lgani ma’lum qilingan.
