Шимолий Корея Малайзия билан дипломатик алоқаларни узаётганини маълум қилди. Бунга сабаб қилиб Малайзиянинг ўз ҳудудидаги Шимолий Корея фуқаросини АҚШга топширмоқчилиги кўрсатилмоқда, деб ёзади «РБК».
Малайзияда яшовчи шимолий кореялик ишбилармон БМТнинг санкцияларини бузган ҳолда Сингапурдан Пхенянга тақиқланган қимматбаҳо молларни етказиб беришда айбланмоқда. Малайзия Олий суди уни АҚШга экстрадиция қилиш керак, деган хулосага келди ва экстрадицияга қарши апелляцияни рад этди.
Корея Марказий телеграф агентлиги томонидан келтирилган КХДР Ташқи ишлар вазирлигининг баёнотида айтилишича, бу ҳодиса «АҚШнинг душманлик сиёсатидан келиб чиққан ҳолда Кореяни изоляция қилиш ва бўғиб ўлдиришга қаратилган, шунингдек, Малайзия ҳукуматининг Америкага лаганбардорлик сиёсати оқибатидаги Кореяга қарши фитнанинг очиқдан очиқ кўринишидир».
«Мавжуд оғир вазиятдан келиб чиқиб, КХДР Ташқи ишлар вазирлиги АҚШ босими остида КХДРга қарши душманлик хатти-ҳаракатини амалга оширган Малайзия билан шу тариқа дипломатик алоқаларнинг тўлиқ узилишини эълон қилади».
Пхеняннинг таъкидлашича, тадбиркор «қонуний ташқи савдо фаолияти» билан шуғулланган ва Малайзия ҳукумати икки давлат ўртасида юзага келадиган барча оқибатларга тўлиқ жавобгар бўлади. Ҳисоботда айтилишича, АҚШ «парда ортидаги манипулятор ва асосий айбдор» сифатида «ҳали қилмишига жавоб беради».
Reuters хабарига кўра, Малайзия суди 2019 йил декабрь ойида Федерал тергов бюросининг (ФҚБ) 54 ёшли Мун Чхве Мюнни экстрадиция қилиш тўғрисидаги талабини қондирган. АҚШ Адлия вазирлиги уни банк фирибгарлигида, «пул ювиш»да ва халқаро санкцияларни бузишда Пхенянга ёрдам беришда айблаган.
Эслатиб ўтамиз, 16 март куни Шимолий Корея етакчиси Ким Чен Иннинг синглиси Ким Ё Чжон Жанубий Корея ва АҚШнинг қўшма ҳарбий машғулотлари муносабати билан КХДРнинг Ватанни тинч йўл билан бирлаштириш бўйича тузилган қўмитани тугатиш масаласини кўтариб, Сеул билан тузилган тинчлик битимидан бош тортиши ҳақида таҳдид қилган эди. Бундан ташқари, у АҚШ президенти Жо Байден маъмуриятини яқин тўрт йил ичида бемалол ухлашимга тўсқинлик қиладиган ҳеч нарса қилмагани яхшироқ, деб огоҳлантирган. Бу Шимолий Кореянинг Байден маъмуриятига президент инаугурациядан кейинги биринчи мурожаатидир.
Шунингдек, Шимолий Корея АҚШ билан алоқаларни тиклаш учун ўз шартларини маълум қилган.
Изоҳ (0)