Хитойнинг Pinduoduo онлайн тижорат компанияси харидорлар сони бўйича Alibaba’дан ўзиб кетди

Хитойнинг Pinduoduo компанияси 17 март куни тўртинчи чорак ҳисоботларини эълон қилди. Компания 2020 йилда 788,4 миллион фаол харидорга эга бўлгани ҳақида хабар беради ва ушбу кўрсаткич бўйича шу даврда 779 миллион фаол харидор қайд этилган Alibaba’дан биринчи марта ошиб кетди. Бу ҳақда «РБК» хабар берди.

Шу билан бирга, ҳисоботга нисбатан бозор муносабати салбий бўлди: 17 март куни премаркетда Pinduoduo акциялари нархи 5,8 фоизга тушди, (Москва вақти билан) соат 14:08 да битта акция нархи 149,87 долларни ташкил қилди, соат 14:15 да пасайиш 4,9 фоизгача кўтарилди.

Pinduoduo даромади 26,55 миллиард юангача (4,08 миллиард доллар) бўлган онлайн харид сегменти туфайли 146 фоизгача ўсди. Бундай натижа билан компания Refinitiv таҳлилчилари берган ҳисоб-китобларидан 19,22 миллиард юанга ошиб кетди. Соф зарар бир йил аввалги 1,75 миллиард юандан 1,38 миллиард юангача қисқарди.

Pinduoduo харидорларга дўстлар билан биргаликда харид учун катта чегирмалар олиш имкониятини беради, Reuters’нинг таъкидлашича, бу усул пандемиянинг иқтисодиётга таъсири туфайли харажатлардан ўзини чеклаб қўйган истеъмолчиларни жалб қилган бўлиши мумкин.

Pinduoduo компаниясига 2015 йил Колин Чжэн Хуан томонидан асос солинган. Компания озиқ-овқат маҳсулотлари ва ичимликлар, кийим-кечак, пойабзал, болалар парвариши учун маҳсулотлар, техника, мебель, хўжалик маҳсулотлари, косметика ва бошқа товарларнинг онлайн савдоси билан шуғулланади. 2018 йилда компания NASDAQ биржасига ўзининг биринчи IPO’ларини (initial public offering — акцияларнинг бошланғич оммавий таклифи) чиқарди. Биржага жойлаштирилганидан буён компания акциялари 550 фоиздан кўпроқ даромад олди.

Аввалроқ Хитойда бойлиги долларда ҳисобланган миллиардерлар сони минг нафардан ошди ва мамлакат бундай кўрсаткичга эришган дунёдаги энг биринчи давлатга айланди. Бироқ Alibaba асосчиси Жек Ма Хитойнинг энг бой одами мақомидан айрилди ва мамлакат миқёсидаги энг бой миллиардерлар учлигидан ҳам тушиб қолди. Бу ҳақда Шанхайнинг Hurun тадқиқот институти China Rich List рейтингида маълумот бериб ўтилган.