Xitoyning Pinduoduo kompaniyasi 17-mart kuni to‘rtinchi chorak hisobotlarini e’lon qildi. Kompaniya 2020-yilda 788,4 million faol xaridorga ega bo‘lgani haqida xabar beradi va ushbu ko‘rsatkich bo‘yicha shu davrda 779 million faol xaridor qayd etilgan Alibaba’dan birinchi marta oshib ketdi. Bu haqda “RBK” xabar berdi.
Shu bilan birga, hisobotga nisbatan bozor munosabati salbiy bo‘ldi: 17-mart kuni premarketda Pinduoduo aksiyalari narxi 5,8 foizga tushdi, (Moskva vaqti bilan) soat 14:08 da bitta aksiya narxi 149,87 dollarni tashkil qildi, soat 14:15 da pasayish 4,9 foizgacha ko‘tarildi.
Pinduoduo daromadi 26,55 milliard yuangacha (4,08 milliard dollar) bo‘lgan onlayn xarid segmenti tufayli 146 foizgacha o‘sdi. Bunday natija bilan kompaniya Refinitiv tahlilchilari bergan hisob-kitoblaridan 19,22 milliard yuanga oshib ketdi. Sof zarar bir yil avvalgi 1,75 milliard yuandan 1,38 milliard yuangacha qisqardi.
Pinduoduo xaridorlarga do‘stlar bilan birgalikda xarid uchun katta chegirmalar olish imkoniyatini beradi, Reuters’ning ta’kidlashicha, bu usul pandemiyaning iqtisodiyotga ta’siri tufayli xarajatlardan o‘zini cheklab qo‘ygan iste’molchilarni jalb qilgan bo‘lishi mumkin.
Pinduoduo kompaniyasiga 2015-yil Kolin Chjen Xuan tomonidan asos solingan. Kompaniya oziq-ovqat mahsulotlari va ichimliklar, kiyim-kechak, poyabzal, bolalar parvarishi uchun mahsulotlar, texnika, mebel, xo‘jalik mahsulotlari, kosmetika va boshqa tovarlarning onlayn savdosi bilan shug‘ullanadi. 2018-yilda kompaniya NASDAQ birjasiga o‘zining birinchi IPO’larini (initial public offering — aksiyalarning boshlang‘ich ommaviy taklifi) chiqardi. Birjaga joylashtirilganidan buyon kompaniya aksiyalari 550 foizdan ko‘proq daromad oldi.
Avvalroq Xitoyda boyligi dollarda hisoblangan milliarderlar soni ming nafardan oshdi va mamlakat bunday ko‘rsatkichga erishgan dunyodagi eng birinchi davlatga aylandi. Biroq Alibaba asoschisi Jek Ma Xitoyning eng boy odami maqomidan ayrildi va mamlakat miqyosidagi eng boy milliarderlar uchligidan ham tushib qoldi. Bu haqda Shanxayning Hurun tadqiqot instituti China Rich List reytingida ma’lumot berib o‘tilgan.
Izoh (0)