Тошкентдаги Янгиҳаёт туманининг айрим ҳудудларида 19 март куни газ таъминоти вақтинча тўхтатилади

19 март куни Тошкент шаҳрининг Янгиҳаёт тумани айрим ҳудудларида таъмирлаш ишлари туфайли газ таъминоти вақтинча тўхтатилади. Бу ҳақда «Ҳудудгаз пойтахт» матбуот хизмати хабар берди.

Маълум қилинишича, соат 11:00—17:00 вақт оралиғида туманнинг «Спутник» 5-, 7-, 15-мавзеларидаги кўп қаватли 30 та уйнинг — 976 та аҳолиси ва 11-, 12-, 13-, 14-мавзеларидаги Чортоқ, Райҳон ва Дарё бўйи кўчаларидаги — 1377 та ерли хонадон ҳамда манзилдаги 69 та улгуржи истеъмолчи табиий газ таъминотидан вақтинча узилади.

Таъмирлаш ишлари тугатилгандан сўнг, табиий газ таъминоти қайта тикланади. «Ҳудудгаз пойтахт» газ таъминоти филиали таъмирлаш ишлари туфайли етказилаётган ноқулайликлар учун аҳоли ва газ истеъмолчиларидан узр сўрайди.

Эслатиб ўтамиз, 10 март куни ҳам Янгиҳаёт туманида олиб борилган таъмирлаш ишлари сабаб айрим ҳудудларда газ таъминоти вақтинча тўхтатилган эди.