Шавкат Мирзиёев Чирчиққа ташрифи чоғида «Ифтихор» маҳалласи аҳолиси билан суҳбатлашгани тўғрисида хабар берилганди. «Gazeta.uz»нинг ёзишича, Президент шаҳар аҳолиси билан суҳбат давомида Чирчиқ шаҳрида «электричка» йўлга қўйилишини маълум қилган.
Таъкидланишича, Президентнинг ташрифи давомида шаҳар аёлларидан бири давлат раҳбарига хотин-қизларга алоҳида эътибор қаратилаётгани, тадбиркорликка ўқитиш ва тайёрлаш бўйича амалга оширилаётган ишлар учун миннатдорчилик билдирган.
«Авваламбор сизларни Наврўз байрами билан табриклайман. Эртага вилоятга ҳоким сайлаймиз. Худо хоҳласа Чирчиқни мутлақо бошқача қиламиз. Қурилишлар, ички йўллар, электр энергия ва газини, барча масалани ҳал қиламиз. Энг катта нарса керак бўлса, ‘электричка’ни йўлга қўямиз. Агар у ҳам маъқул бўлмаса Тошкентдан Чирчиққа қараб ерусти метросини ҳам қурамиз. Тошкентга қулай бориб келишларинг учун. Умуман саноатда ишлаб чиқаришни кўпайтириб, сизларга ва фарзандларингизга иш жойини ташкил қиламиз. Нуронийларимизга дам олиш масканларини қурамиз. Чирчиқ анча чарчаб қолди. Яъни сув қувурлари, электр энергия таъминоти чарчаган. Кечаси ёруғлик, свети йўқ десак бу ҳам тўғри. Тегирмон навбати билан дегандек, секин-секин ҳамма масалаларни ҳал этамиз», — деди Шавкат Мирзиёев.
Мулоқот чоғида подъезддан бошқалар қараб турганини кўрган Президент уларни ҳам суҳбатга тортган. Давлат раҳбари «Шу ерда яшайсизларми? Иссиқ сув борми? Нима муаммолар бор, сизларни нима қийнаяпти?» деб сўраган. Аёллардан бири уйни иситиш билан муаммолар борлигини айтган.
Эслатиб ўтамиз, 18 март куни Шавкат Мирзиёев Тошкент вилоятининг Чирчиқ шаҳридаги қурилиш ишлари билан танишди.
Изоҳ (0)