Қашқадарё вилоятининг Деҳқонобод туманида яшовчи фуқаро отасидан қолган ов қуролини ўз ихтиёри билан туман ИИБга топширди. Бу ҳақда «Дарё»га туман ИИБ бошлиғи ўринбосари Дилшод Мирзаев маълум қилди.
Маълум бўлишича, 2021 йилнинг 17 март куни 1987 йил Деҳқонобод туманининг «Оқработ» маҳалласи, Темирали қишлоғида туғилган Жалил Тўхтаев молхонаси деворидан отаси Қурбон Тўхтаевдан қолган ов қуролини топиб олганини айтиб, туман ИИБга мурожаат қилган.
«‘Оқработ’ маҳалласининг Темирали қишлоғида яшовчи 34 ёшли фуқаро ўз молхонасини бузиб олаётган пайтда молхона деворлари орасидан отасидан қолган 1956 йилда ишлаб чиқарилган 1 нилли, 16 калибрли ўқотар ов қуролини топиб олганини маълум қилиб, ўз ихтиёри билан туман ИИБга топширди. Ов қуроли туман ИИБда расмийлаштириб олинди», — дейди Дилшод Мирзаев.
Эслатиб ўтамиз, Жиноят кодексининг 248-моддасига мувофиқ қуролни, патронларни, ўқ-дориларни, портловчи моддаларни ва портлатиш қурилмаларини ўз ихтиёри билан топширган жисмоний ва юридик шахс қонун ҳужжатларида белгиланган жавобгарликдан озод қилинади.
Шунингдек, Вазирлар Маҳкамасининг «Рўйхатга олинмаган қуролни, патронларни, ўқ-дориларни, портловчи моддаларни ва портлатиш қурилмаларини ички ишлар органларига ўз ихтиёри билан топшириш тартиби тўғрисидаги низомни тасдиқлаш ҳақида»ги қарорига кўра, жисмоний ёки юридик шахс ички ишлар органларига қурол ва (ёки) уларнинг ўқ-дориларини ўз ихтиёри билан топширганлиги учун пул мукофоти билан тақдирланиши, 1974 йилгача ишлаб чиқарилган фуқаровий ўқотар қурол топширган жисмоний шахс эса уни имтиёзли олиш ҳуқуқига эга бўлиши мумкин.
Изоҳ (0)