Хитой ҳукумати фавқулодда вазиятларда фойдаланиш учун коронавирусга қарши тўртинчи вакцинасини тасдиқлади. Препаратни тайёрлашда Хитой оғмахонининг тухумдонидаги ҳужайралардан фойдаланилади, деб ёзмоқда Global Times.
Таъкидланишича, вакцина Хитой касалликларни назорат қилиш ва олдини олиш маркази ҳамда Хитой Фанлар академиясининг директори, академик Гао Фу бошчилигидаги хитойлик олимлар гуруҳи томонидан ишлаб чиқилган.
Хитой Фанлар академиясининг таъкидлашича, вакцинанинг биринчи ва иккинчи босқич клиник синовлари 2020 йил октябрь ойида якунлаган. Натижаларнинг кўрсатишича, тўлиқ эмланишдан сўнг синов иштирокчиларида жиддий ножўя реакциялар кузатилмаган. Ҳисоботда айтилишича, вакцинанинг қонда ишлаб чиқарган нейтраллаштирувчи (зарарсизлантирувчи) антитаналари даражасини ҳозирги кунда дунёда қўлланилаётган бошқа рекомбинант оқсил вакциналари ва мРНК вакциналари билан таққослаш мумкин.
Вакцинанинг учинчи босқич клиник синовлари 2020 йил ноябрь ойида Хитой, Ўзбекистон, Покистон, Эквадор ва Индонезияда бошланди, ушбу босқичда 29 минг иштирокчини эмлаш режалаштирилган эди.
Таъкидланишича, учинчи босқич клиник синовлари, айниқса, синовни бошлаб берган мамлакат Ўзбекистон томонидан юқори тан олиниши туфайли муваффақиятли ўтмоқда.
22 февраль куни Ўзбекистон қонун чиқарувчи органи вакцинани мамлакатдаги фавқулодда вазиятларда қўллашга рухсат берди. Ўзбекистонда вакцина 1 март куни фойдаланишга тасдиқланди. Ўзбекистонда ушбу вакцина дунёдаги энг хавфсиз ва энг самарали воситалардан бири сифатида тан олинган.
Эслатиб ўтамиз, февраль ойининг охирида Хитой коронавирусга қарши яна иккита вакцинасини бозорга киритишни маъқуллаган. Ундан аввал Хитой Sinovac вакцинасидан фойдаланишни тасдиқлаган эди. Вакцинанинг 79 фоиз самарадорлик кўрсатгани маълум қилинган. 2020 йил декабрь ойида Хитойнинг миллий фармацевтика гуруҳи (Sinopharm) таркибига кирувчи Пекин институти томонидан тасдиқланганидан сўнг мазкур препарат Хитойда кенг фойдаланиш учун яшил чироқни олган иккинчи COVID-19 вакцинасига айланган.
Изоҳ (0)