«Оқ фил» кинотанқидчилик ва киноматбуот миллий мукофотининг Экспертлар кенгаши ушбу мукофотни таъсис этган Россия Федерацияси Кинематографчилар уюшмасининг Киношунослар ва кинотанқидчилар гильдияси бошқармаси билан зиддият келиб чиққанини маълум қилди. Кенгаш баёноти «Ҳужжатли кино ва телевидение гильдияси» нотижорат ташкилоти сайтига жойлаштирилди, деб ёзади Meduza.
Можаро Кинематографчилар уюшмаси аъзолари, шунингдек, унга аъзо бўлмаган танқидчилар ва журналистларни ўз ичига олган «Оқ фил» Экспертлар кенгаши томонидан 2020 йилги мукофотни муҳокама қилиш пайтида Алексей Навальний ва унинг ижодий гуруҳини «суриштирув тергов ҳужжатли фильмлари учун ‘Йил воқеаси’ номинацияси бўйича» мукофотлаш тўғрисида қарор қабул қилгандан кейин бошланган.
«Мазкур қарор туфайли мукофот таъсис этилган 22 йил ичида биринчи марта Экспертлар кенгаши ва Гильдия бошқармаси ўртасида зиддият келиб чиқди. Бундан ташқари, Кинематографчилар уюшмаси гильдияни ва ушбу ташкилотга аъзо бўлмаган бошқа киношуносларни Экспертлар кенгаши таркибидан чиқаришни талаб қилди. Экспертлар кенгаши босим ва цензурали аралашишга уринишларга дуч келди, бу мукофот қоидалари ва кенгаш аъзоларининг иродасини эркин ифода этиш руҳига зиддир», — дейилади баёнотда.
Гильдия бошқармаси раҳбари Разлоговнинг 25 февралдаги баёнотига кўра, гильдия келишмовчилик сабабини «Оқ фил» Экспертлари кенгаши ташкилотда етакчи ролни «Россия Кинематографчилар уюшмаси ва шунга мувофиқ, Киношунослар ва кинотанқидчилар гильдиясига аъзо бўлмаган танқидчилар ва экспертлар ўйнаши кераклигини» тарғиб қилгани билан изоҳлаган.
Мукофот Экспертлар кенгашининг баёнотида айтилишича, «юзага келган қарама-қаршилик Кинематографчилар уюшмаси ичидаги азалий ўзгармас куч ва турғунлик гарови бўлиб келаётган Гильдия бошқармасининг обрўсига путур етказади». Кенгаш вакиллари, шунингдек, «2020 йил охирида ‘Оқ фил’ мукофотини топшириш ҳамда унинг келажаги учун жавобгарликни» ўз зиммасига олишини билдирган.
Экспертлар кенгашининг баёнотига 40 дан ортиқ одам, жумладан, «Сеанс» журналининг асосчиси Любовь Аркус, киношунослар Антон Долин, Юрий Богомолов ва Юрий Гладильшиков имзо чеккан.
Февраль ойида «Собеседник» газетаси Алексей Навальний жамоаси томонидан 2021 йилнинг январь ойида чиқарилган «Путиннинг қасри» фильми «Оқ фил» мукофотига таклиф қилингани ҳақида хабар қилди. Россия Кинематографчилар уюшмаси бу хабар ҳақиқатан йироқ эканини айтди, чунки «Россияда 2020 йил 1 январдан 31 декабрига қадар премьера қилинган» фильмларгина 2020 йилги мукофотга қабул қилинади.
Маълумот учун, Россия Кинематографлар уюшмаси режиссёр Никита Михалков томонидан бошқарилади.
Эслатиб ўтамиз, 19 январь куни асосчиси мухолифатчи Алексей Навальний бўлган Коррупцияга қарши кураш фонди «Путин учун қурилган қаср» ҳақида катта суриштирувни эълон қилди.
Алексей Навальний иддао қилишича, Россия президенти Геленжик яқинида, Қора денгиз соҳилида «бутун бошли қироллик»ка эгалик қилади, унинг майдони «Монакодек 39 та князлик ҳудудига тенг».
Кейинроқ Россия президенти Владимир Путин Коррупцияга қарши кураш фонди (ККФ) суриштирувида тилга олинган Гелинжикдаги қасрга на у, на унинг қариндошлари эгалик қилишини билдирди. «У ерда менинг мулким сифатида кўрсатилган нарсаларнинг ҳеч бири на менга, на менинг яқин қариндошларимга тегишли эмас ва ҳеч қачон тегишли бўлмаган. Ҳеч қачон», — деди Владимир Путин.
Изоҳ (0)