Қирғизистон COVAX дастури доирасида мамлакатга коронавирусга қарши AstraZeneca вакцинанинг етказиб берилиши масаласини кўриб чиқишни тўхтатди. Бу ҳақда Қирғизистон соғлиқни сақлаш вазири Алимқодир Бейшеналиевга таяниб «Интерфакс» хабар берди.
«Коронавирус инфекциясига қарши AstraZeneca вакцинаси бўйича баъзи юридик масалалар мавжуд, айни пайтда бизнинг ҳуқуқшуносларимиз улар устида иш олиб бормоқда, шунинг учун вакцинанинг етказиб берилиши ҳақидаги келишувга оид ишлар тўхтатилди», — деди Бейшеналиев.
Унинг сўзларига кўра, мамлакат COVAX дастури доирасида 1,2 миллион дозада вакцинани бепул олишга умид қилмоқда. «Биз AstraZeneca вакцинаси билан боғлиқ мулоҳазаларимизни Қирғизистон ҳукуматига, хусусан, асоратлар учун масъул бўлган шахсларга юбордик. Аммо ушбу вакцинадан бутунлай воз кечиш ниятимиз йўқ», — деди Соғлиқни сақлаш вазирлиги раҳбари.
Яқин кунларда Қирғизистон Россиянинг «Спутник V» ва Хитойнинг Sinopharm компаниялари вакцинасини қабул қилиб олади, дея қўшимча қилди Бейшеналиэв. «Вакциналар яқин кунларда етиб келади. Вакцинация апрель ойида бошланади, тиббиёт ходимлари малака ошириб, зарур тайёргарликдан ўтказилади», — деди Бейшеналиев.
Биринчи босқичда тиббиёт ходимлари, касалликнинг оғир шакллари ривожланишининг хавфи сезиларли даражада юқори бўлган ижтимоий-демографик гуруҳлар, ўқитувчилар, ҳуқуқни муҳофаза қилиш ва хавфсизлик идоралари ходимлари, хизмат кўрсатиш соҳаси, савдо ва умумий овқатланиш жойларидаги ходимларни эмлаш режалаштирилган.
Иккинчи босқичда вакцина 60 ёшдан ошганларга, клиник хавф омиллари ва сурункали касалликларга чалинган ҳамда аҳолининг ижтимоий ҳимояга муҳтож гуруҳларига берилади. Учинчи босқичда вакцинация давлат ва хайрия ташкилотлари маблағлари ҳисобидан давом эттирилади.
Қирғизистон Соғлиқни сақлаш вазирлиги эмлаш марказларини Чуй вилояти, Бишкек ва Ўш шаҳарларида жойлаштириш бўйича дастлабки режани ишлаб чиқди. Эмлаш жараёнини тезкор кузатиш натижаларига қараб, қолган эмлаш пунктлари республиканинг барча ҳудудларида жойлаштирилади.
Эслатиб ўтамиз, AstraZeneca вакцинаси билан эмлашлар бошлангандан сўнг вакцинани қабул қилганлар орасида касалхонага ётқизиш ва ўлим ҳолатлари кузатила бошлади. Ўлим ҳолатини ўрганган шифокорлар ушбу дори билан эмланганларда қон тромблари ҳосил бўлганини аниқлади.
Аввалроқ кўплаб Европа мамлакатлари AstraZeneca вакцинасидан фойдаланишни тўлиқ ёки қисман тўхтатгани ҳақида эълон қилган, хусусан, Германия, Франция, Италия, Испания, Словения, Португалия, Кипр, Нидерландия, Австрия, Дания, Эстония, Латвия, Литва, Болгария, Ирландия, Люксембург, Норвегия ва Исландия, шунингдек, Европадан ташқаридаги Индонезия, Конго, Таиланд ва Жанубий Африка мамлакатларида мазкур вакцинадан фойдаланиш тўхтатилган.
Изоҳ (0)