Эрон ҳукумати мамлакатда ишлаб чиқилган ва ҳалок бўлган Муҳсин Фахризода шарафига «Фахра» номини олган вакцинанинг одамлардаги клиник синовларига старт берилганини маълум қилди, дея хабар берган Press TV.
«‘Фахра’ вакцинасининг ҳайвонлардаги тестлари самарадорлик борасида яхши натижалар кўрсатди ва энди мазкур препаратни одамларда синаб кўриш бўйича тажрибалар бошланди», — деган Эрон соғлиқни сақлаш вазири Саид Намаки.
Теҳрон 2020 йил ноябрь ойида ўлдириб кетилган ядрошунос олим Фахризоданинг ўлимида Исроилни айбламоқда. Олимнинг ўғли мазкур вакцинадан биринчилардан бўлиб эмланган. Одамлардаги клиник синовлардан олдин «Фахра» вакцинаси 650 та турли ҳайвонда, хусусан, сичқонлар, қуёнлар, денгиз чўчқалари ва маймунларда тест қилинган.
Эрон ҳукумати препаратни оммавий ишлаб чиқариш ишларини ташкил қилиш мақсадида махсус корхонанини лойиҳалаштириш ҳамда қуриш ишларини бошлаб юборган. Фабрика ёзда ишга туширилади.
Эрон айни кунгача Россия, Хитой, Ҳиндистон ва Кубадан жами 1 миллион 260 минг дозадаги COVID-19 коронавирус инфекциясига қарши вакцинани импорт қилган. Мамлакатда COVID-19 пандемияси бошланганидан бери 1,7 миллион нафардан ортиқ кишида коронавирус аниқланган ва 61 мингдан зиёд бемор касаллик асоратлари оқибатида вафот этган.
Эслатиб ўтамиз, 2020 йил 27 ноябрда Фахризоданинг террорчилик ҳаракати қурбони бўлгани ҳақида хабар берилган. Маҳаллий Press TV телеканали олимга қилинган суиқасдда ишлатилган қуроллар, мазкур қотилликнинг ўзига хос белгилари ва хусусиятлари мудҳиш режа ортида Исроил турганига ишора қилаётганини ёзган. Исроил бош вазири Биньямин Нетаньяху эронлик олимнинг ўлдириб кетилишига Исроилнинг алоқаси йўқлигини билдирган.
Изоҳ (0)