Қироллик оиласи можаролари, Гавайидаги сув тошқинлари, чўкиб кетган муҳожирлар, коинотда ҳарбий машғулотлар ўтказган Франция. Жаҳон ҳафта ичида

Март ойининг иккинчи ҳафтасини ҳам якунлаб олдик. Анъанага мувофиқ ҳафта давомида жаҳон саҳнида юз берган энг муҳим воқеаларни эслаб ўтсак.

Буюк Британия қироллик оиласи можаролари

Айтиш мумкинки, ўтган ҳафтанинг энг кўп муҳокама қилинган воқеаси Буюк Британия қироллик оиласи билан боғлиқ. Гап шундаки, Британия шаҳзодаси Гарри ва унинг рафиқаси Меган Маркл америкалик машҳур телебошловчи Опра Уинфрига интервью берди.

Интервью Тошкент вақти билан 8 мартга ўтар кечаси Американинг CBS телеканалида, 9 мартга ўтар кечаси Британиянинг ITV телеканалида намойиш қилинди. Норасмий маълумотларга кўра, ушбу каналлар интервьюнинг трансляцияси ҳуқуқи учун камида 8,4 миллион доллар тўлаган. Аммо харажатлар ўрни аллақачон қопланган бўлиши мумкин, чунки трансляция АҚШда 17 миллион кишини, Буюк Британияда 12 миллион кишини экран қаршисига «михлаган».

Гарри ва Меган нималар ҳақида гапирган эди?

Шаҳзода Гарри ва Меган Маркл расмий тўй маросимидан уч кун олдин яширинча турмуш қурган. Қироллик оиласининг баъзи аъзолари жуфтликнинг биринчи фазанди Арчининг танаси қорамағиз бўлишидан хавотирланган (бу айнан ким эканлиги номаълум, аммо қиролича Елизавета II ёки унинг эри шаҳзода Филипп эмас). Болага шаҳзода унвони берилмаган. Британия ОАВ бу масалада изоҳ сўраб, Меганни таъқиб қилган, аммо қироллик оиласи уни жамоатчилик олдида тилини тийиб юришга мажбур қилган. Меган ўз жонига қасд қилиш ҳақидаги хаёлларгача борган.

Меган ва Гарри қироллик оиласидан ёрдам сўраганида, улар ёрдам бермаган. Жуфтликнинг қироллик ваколатларидан воз кечиши Гаррининг отаси шаҳзода Чарльз билан зиддиятга боришига ва акаси шаҳзода Уильямдан узоқлашишига сабаб бўлган. Қироллик оиласи Гарри ва Меганни молиявий таъминлашни тўхтатган, шунинг учун улар Netflix ва Spotify билан шартнома тузган. Уларнинг ёзда туғиладиган иккинчи фарзанди қиз бўлиши кутилмоқда.

Мазкур интервьюдан кейин бутун дунёнинг нигоҳи қироллик оиласига қаратилди. ОАВдан тортиб оддий одамларгача муҳокама қилди. Ҳаммага қиролича Елизавета II нинг қандай муносабат билдириши қизиқ бўлди. Воқелик ҳақида бу ерда батафсил ўқишингиз мумкин.

Гавайидаги сув тошқинлари

Ўтган ҳафтада Гавайи оролларида сув тошқинлари содир бўлди. Натижада кўплаб уйлар ва бинолар, кўприклар вайрон бўлди. Тошқинга Маруи шаҳрида тўғон бузилиши сабаб бўлган. Хайкудаги тўғон 8 март куни бузилган. Узоқ давом этган сел вазиятни янада оғирлаштирган. Дарё бўйида яшайдиган маҳаллий аҳолига бошқа ерга кўчиш тавсия қилинган.

«Хайку ҳудудидаги Каупакалуа тўғонининг қуйи қисмида жойлашган барчани эвакуация қилиш буюрилган», — дейилади штат фавқулодда вазиятлар бошқармаси баёнотида.

Одамларга вақтинча махсус очиқ эвакуация марказларида қолиш таклиф этилди.

Ҳукуматдагиларнинг фикрига кўра, тўғоннинг бузилиши «одамлар ҳаёти учун хавфли тошқинлар ва мол-мулкка катта зарар етказиш» каби салбий оқибатларга олиб келади.

Тошқин оқибатида уйлар ва дарёнинг кўприклари вайрон бўлган. Шунингдек, 1300 га яқин хонадон электр таъминотидан узилиб қолган.

Маҳаллий аҳоли охирги 40 йил ичида бундай кучли сув тошқини кузатилмаганини таъкидламоқда. Одамлар 15 дақиқа ичида бутун бошли кўчанинг сув остида қолганига гувоҳ бўлган.

Ўрта Ер денгизига ғарқ бўлган мигрантлар

Ўрта Ер денгизининг Тунис қирғоқлари яқинида ичида ноқонуний кўчаётган муҳожирлар бўлган иккита қайиқ ағдарилиб, чўкиб кетди.

Қайиқлар Италиянинг Лампедуза ороли томон кетаётган эди. Ҳалокат оқибатида камида 39 киши ҳалок бўлган. Ҳалок бўлганлар орасида аёллар ва болалар ҳам бор. Уларнинг барчаси Африка мамлакатлари фуқаролари бўлган.

Соҳил хавфсизлик хизмати 165 кишини қутқаришга муваффақ бўлган. Қидирув-қутқарув ишлари давом этмоқда. Қайиқларда қанча одам бўлгани ҳозирча номаълум.

Аввалроқ Туркия соҳиллари яқинидаги кема ҳалокатида 4 киши қурбон бўлгани ҳақида хабар берилган, фожиа ёмон об-ҳаво шароити туфайли юз берган бўлиши мумкинлиги тахмин қилинганди.

Шунингдек,  Россия байроғи остидаги «Арвин» қуруқ юк ташувчи кемаси Қора денгизда, Туркиянинг Бартин вилояти соҳиллари яқинида чўкиб кетгани, фалокат туфайли икки киши ҳалок бўлгани ҳақида хабар берилган.

Коинотда ҳарбий машғулотлар

Франция ҳарбийлари мамлакат Қуролли кучлари тарихида биринчи марта 8 март, душанба куни коинотда ўқув машғулотларини бошлади.

Ўқув машғулотлар 1965 йилда учирилган биринчи француз сунъий йўлдошига бағишланиб, AsterX деб номланди. Машғулотлар пайтида ҳарбийлар ўта хавфли космик объект ва Франция сунъий йўлдошига нисбатан таҳдидларни кузатиб боради.

«Сценарий бўйича бир қатор воқеалар юз беради ва бизнинг космик инфратузилмамизга нисбатан инқирозли вазиятлар ва таҳдидлар пайдо бўлади, лекин бу ҳаммаси эмас» — дейди космик кучлар қўмондони Мишель Фридлинг Тулузадаги қўмондонлик штабида ўтказилган матбуот анжуманида. У машқларни «бизнинг (французларнинг) тизимларимиз учун стресс синови» деб атади ва улар «Франция армияси ва ҳатто Европа учун биринчи» эканини таъкидлади.

ОАВ хабарларига кўра, машғулотларда АҚШ космик кучлари ва Германия космик агентликлари ҳам иштирок этмоқда. Улар 12 март, жума кунигача давом этади.

Маълумот учун, Франция космик кучлари қўмондонлиги 2019 йилда ташкил этилган. 2019—2025 йилларда уни молиялаштиришни 5 миллиард долларга, ходимлар сонини эса 500 кишига етказиш режалаштирилган.