Туркияда «хавфсиз туризм дастури» доирасида туризм ходимларини коронавирусга қарши режадан ташқари бепул эмлаш бошланди, деб хабар бермоқда Туркиянинг Ўзбекистондаги элчихонаси матбуот хизмати.
«Хавфсиз туризм сертификати дастури» яқинлашиб келаётган сайёҳлик мавсумида чет эллик сайёҳларни кутиб олиш ҳамда соҳа вакиллари ва туб аҳолининг саломатлигини таъминлаш учун ишлаб чиқилган.
«Вакцина олиш учун махсус рўйхатдан ўтиш тизимига мурожаат қилиш мумкин», — дейилади вазирлик хабарида.
Аниқлик киритилишича, хизматдан вазирлик томонидан сертификатланган жойлашув объектлари, озиқ-овқат ва ичимликлар ишлаб чиқарувчи корхоналар, сайёҳлик агентликлари ходимлари, гидлар ва сайёҳлик транспорти ҳайдовчилари фойдаланиши мумкин.
Сайёҳлик корхоналари учун махсус тизим яратилган бўлиб, улар у ерга вакцинация учун ўз ходимлари маълумотларини киритади.
Коронавирусга қарши курашиш ва дунёнинг энг хавфсиз йўналишларидан бири сифатида ўз мавқейини янада ошириш бўйича давомли саъй-ҳаракатлар доирасида, Туркия дунё бўйича соҳадаги энг биринчи ва энг муваффақиятли мисоллардан бир бўлган «Хавфсиз туризм сертификати дастури»га сармоя киритишда давом этмоқда. Мамлакат ўз амалиёт доирасини кенгайтирди ҳамда 30 ва ундан ортиқ хонали турар-жой иншоотлари учун амалиёт мажбурий этиб белгиланди. Ҳозирга қадар 8 000 дан ортиқ иншоотлар сертификатланган.
Бундан ташқари, Туркияда 15 апрелдан сайёҳлар учун ПЦР-тестларни бекор қилиш режалаштирилмоқда, аммо бу мамлакатдаги эпидемиологик вазиятга боғлиқ бўлади. Ҳозирча республика ҳукумати йирик шаҳарларда ва аҳоли зич жойлашган баъзи вилоятларда, шу жумладан, Анталия ва Бодрумда чеклов чораларини бекор қилмоқчи эмас.
Аввалроқ Туркия ҳукумати мамлакатга келаётган сайёҳлардан коронавирус учун манфий натижали тест маълумотномасини талаб қилиш муддатини 26 мартга қадар узайтиргани хабар берилган эди. Шунингдек, Туркияга бормоқчи бўлган фуқароларга 15 мартдан мажбурий электрон сўровнома жорий қилиниши ҳам маълум қилинди.
Изоҳ (0)