ОАВ: Британияда Сурия президентининг рафиқасига нисбатан суриштирув бошланди

Лондон полицияси Сурия президенти Башар Асаднинг рафиқаси Асма Асадга нисбатан дастлабки суриштирув бошлади, у терроризмга даъват этганликда гумон қилинмоқда, деб ёзади «РБК» The Sunday Times’га таяниб.

Суриштирув Guernica 37 халқаро адвокатлар ҳайъати Лондон полициясининг терроризмга қарши кураш бошқармасига икки марта хабар жўнатганидан кейин бошланди. Guernica ҳуқуқшунослари бир неча ой давомида текширув олиб борган, дейилади ҳайъат релизида.

Уларнинг фикрича, Асма Асад Сурия Қуролли Кучларини қўллаб-қувватлаб, омма олдида нутқ сўзлаган вақтида террорчиликка даъват этган. Мурожаатнома муаллифлари, шунингдек, Асма Асаднинг Сурия бошқарув синфига нисбатан таъсири ва ҳарбийларни қўллаб-қувватлаши бўйича далилларни ҳам юборган.

Асаднинг судга келиши эҳтимоли кам, шунингдек, прокурорлар сиртдан ишлашда давом этишни исташ-истамаслиги номаълум. Бундан ташқари, Асма Асад Британия фуқаролигидан маҳрум қилиниши мумкин.

Лондон полицияси ҳарбий жиноятлар билан шуғулланувчи бўлинма Суриядаги можаролар билан боғлиқ мурожаатни қабул қилганини тасдиқлади. Айни пайтда у кўриб чиқилмоқда.

Асма Асад Лондонда сурияликлар оиласида туғилган, у ҳозир 45 ёшда. У молиявий секторда, хусусан, Deutsche Bank’да, шунингдек, J.P.Morgan’нинг Нью-Йоркдаги офисида ишлаган. 2000 йил ноябрида у Сурияга қайтиб, декабрда президент Башар Асадга турмушга чиққан.

Асма Асадга, шунингдек, Башар Асаднинг бошқа яқин қариндошларига қарши АҚШ ва Евроиттифоқ санкциялар киритган. Брюссель уларнинг Евроиттифоққа киришини тақиқлаган ва уларнинг активларини блоклаган. Аммо Асма Асадда Британия фуқароси сифатида мамлакатга кириш ҳуқуқи бўлган.

АҚШ Цезарь қонуни деб аталувчи ҳужжат бўйича санкциялар киритган, у Асаднинг режимини қўллаб-қувватлайдиган шахсларга нисбатан чекловлар киритилишини кўзда тутади.

Аввалроқ Сурия президенти Башар Асад ва унинг рафиқаси Асма Асадда коронавирус инфекцияси аниқланган, улар ўзини яккалаш режимига ўтгани ва аҳволи яхши экани хабар берилган эди.

2019 йилда эса Асма Асад бир йиллик даволанишдан сўнг онкологик касалликни енггани маълум бўлган эди.