Қирғизистон ҳукуматининг Боткен вилоятидаги ваколатхонаси Ўзбекистоннинг Сўх анклавига коридор берилиши ҳақидаги маълумотларни рад этди, деб хабар беради «Vesti.kg».
Қайд этилишича, Ўзбекистоннинг Сўх анклавига коридор берилиши тўғрисидаги маълумотлар ҳақиқатга тўғри келмайди.
«11—12 март кунлари икки мамлакат раҳбарларининг учрашувдан сўнг, Ўзбекистонга Сўх анклави учун коридор тақдим этилиши тўғрисида нотўғри маълумот тарқалди. Музокаралар якунида коронавирус пандемияси сабаб ёпилган Боткен вилоятининг Қадамжой туманидаги ‘Қайтас’ назорат-ўтказиш пункти ишини қайта йўлга қўйишга келишиб олинди», — дейилади хабарда.
Шунингдек, маълум қилинишича, Ўзбекистон фуқаролари назорат-ўтказиш пунктидан олдингидек тартибда ўтишлари мумкин.
«Ўзбекистонликлар Қирғизистонга ‘Қайтас’ назорат-ўтказиш пункти орқали киради ва мамлакатимиз ҳудуди орқали Сўх туманига боради, қайта текширув билан яна Ўзбекистоннинг Сўх туманига кириши мумкин. 2020 йилнинг мартидан бошлаб Ўзбекистон фуқаролари ушбу ҳудудга фақатгина ‘Қадамжой’ назорат-ўтказиш пункти орқали кира оларди», — дейилади хабарда.
Таъкидланишича, «Қизил-Жилдиз» ўтказиш пунктининг очилиши билан фуқароларнинг ҳаркатланиши осонлашади.
«Трассадаги автомобиллар тирбандлиги камаяди. Сўх туманини Ўзбекистон билан боғловчи авиақатновлар йўлга қўйилади, шу мақсадда кичик самолётлар парвоз қилишни бошлайди. Шу муносабат билан фуқароларимизни хавотирланмасликка ва текширилмаган маълумотларга ишонмасликни сўраймиз», — дейилади хабарда.
Аввалроқ Қирғизистон президенти матбуот котиби Галина Байтерек Садир Жапаровнинг Тошкентга давлат ташрифи давомида «Қирғизистон Сўхга йўл очишга, Ўзбекистон эса Ункар-Тоони беришга тайёр»лигини маълум қилганди.
Мавзуга доир:
Изоҳ (0)