Боливиянинг собиқ адлия вазири Альваро Коимбра ва собиқ энергетика вазири Родриго Гусман 13 март куни, прокуратуранинг фикрига кўра, 2019 йилнинг ноябрь ойида амалга оширилган давлат тўнтариши бўйича терговнинг бир қисми сифатида ҳибсга олинди. Бу ҳақда Agencia Boliviano de Information нашрига таяниб, «ТАСС» хабар берди.
Собиқ амалдорларга терроризм, исёнга даъват қилиш ва фитна айбловлари қўйилган.
Аввалроқ прокуратура яна учта собиқ вазир ва 2019 йил ноябрь ойида давлат раҳбари Эво Моралеснинг истеъфосидан кейин президент вазифасини бажарувчи сифатида ишлаган Жанин Аньесни ҳибсга олишга буйруқ берган эди. «Сиёсий таъқиблар бошланди», — деб ёзган Аньес Twitter саҳифасида прокурорнинг қарорига изоҳ бериб.
Боливияда 2019 йилнинг 20 октябрь куни президентлик сайловлари бўлиб ўтган. Олий сайлов судининг маълумотларига кўра, ўша пайтда амалдаги давлат раҳбари Моралес кўпчилик овоз билан ғолиб бўлган. Унинг асосий рақиби Карлос Меса биринчи даврада рақибининг ғалабасини тан олмаслигини таъкидлаган.
Уч ҳафта давом этган норозилик намойишларидан сўнг Боливия қуролли кучлари расмийлари Моралесдан истеъфога чиқишини сўради ва у вазиятни давлат тўнтариши деб баҳолаган ҳолда лавозимини тарк этди ва мамлакатдан чиқиб кетди.
Маълумот учун, Боливия прокуратураси собиқ президент Эво Моралесга расмий равишда терроризмда айблаган эди. Прокуратура маълумотларига кўра, собиқ президент 2019 йил ноябрь ойидаги норозилик намойишлари пайтида озиқ-овқат блокадаси ва шаҳарларни қамал қилган. Прокуратура собиқ президентга тегишли телефон суҳбатининг ёзувини эълон қилди ва уни ҳақиқийлигига кафолат берди.
Сенаторлар палатаси спикерининг иккинчи ўринбосари, мухолифат вакили Жанин Анес янги сайловлар ўтказилгунга қадар вақтинча президентлик вазифасини бошқаришини эълон қилди ва ўзининг янги Вазирлар Маҳкамасини ташкил қилди.
2020 йилнинг октябрь ойида қайта сайлов ўтказилди, натижаларга кўра, Моралеснинг шериги Луис Арсе президент этиб сайланди.
Изоҳ (0)