Таиланд Бош вазир Прают Чан-Оч ва бир нечта ҳукумат аъзолари мамлакатда AstraZeneca билан эмлаш ишларини кейинга қолдирди. Улар Норвегия ва Дания каби бир қатор мамлакатларда қон тромблари келиб чиқиш хавфи туфайли мазкур вакцинадан фойдаланиш тўхтатилганидан сўнг шундай қарорга келди, деб ёзади «РБК».
12 март куни Таиландда AstraZeneca ёрдамида коронавирусга қарши эмлаш ишлари бошланиши керак эди. Мамлакат расмийлари томонидан буюртма қилинган 63 миллион доза вакцинанинг 61 миллион дозасини мазкур вакцина ташкил қилади.
«Эмлашни кейинга қолдириш билан биз AstraZeneca вакцинаси ёмон ёки сифатсиз демоқчи эмасмиз. Хавфсизлик тўғрисидаги ҳисоботларни кўриб чиқиш ва қонда тромбларнинг пайдо бўлиши хавфини ўрганиш мақсадида эмлашни кейинга қолдирдик» ,— деди Чулалонгкорн университети вирусологи ва Таиланд Соғлиқни сақлаш вазирлигининг эмлаш комиссияси аъзоси Ёнг Пувораван.
Таиланд Соғлиқни сақлаш вазирлигининг эмлаш дастури бўйича маслаҳатчиси Пиясакол Саколсатаядорннинг сўзларига кўра, мамлакатда оммавий эмлашлар кўпи билан икки ҳафтага қолдирилади. Аҳолининг хавф остидаги гуруҳларини Хитойнинг Sinovac препарати билан эмлаш давом эттирилади.
Шунингдек, Болгария бош вазири Бойко Борисов мамлакатда COVID-19’га қарши AstraZeneca вакцинаси билан эмлашни тўхтатишни буюрди.
Болгария ҳукумати веб-сайтидаги баёнотда айтилишича, Болгария ҳукумати раҳбари AstraZeneca вакцинасидан фойдаланишни Европа дори-дармон агентлиги (EMA) ушбу препаратнинг хавфсизлиги ҳақидаги барча шубҳаларни рад этгунига қадар тўхтатиб туришга қарор қилди.
«AstraZeneca вакцинасини қабул қилиш мумкин ёки йўқлигидан қатъи назар, Европа тиббиёт агентлигидан ёзма равишда аниқ тасдиқланган ташхис олинмагунча эмлашни тўхтатинг», — деди Борисов.
Борисов бошчилигидаги йиғилишда иштирок этган Болгария Соғлиқни сақлаш вазирлиги раҳбари Костадин Ангелов Англия–Швеция компаниясининг вакцинадан фойдаланишни вақтинча тўхтатиб туриш тўғрисида буйруқ чиқаришга тайёрлигини билдирди. «Эмлаш кампанияси Pfizer ва Moderna вакциналари ёрдамида давом эттирилади», — деди Ангелов.
Болгария Соғлиқни сақлаш вазирлигининг маълумотларига кўра, сўнгги 24 соат ичида мамлакатда COVID-19 учун 17 мингдан ортиқ тест ўтказилган ва касалликни юқтириш бўйича 3121 та ҳолат қайд этилган. Кун давомида 95 киши касалликдан вафот этиб, жами инфекция қурбонлари сони 11 мингдан ошган.
Аввалроқ Жанубий Корея AstraZeneca вакцинаси билан мамлакатдаги кекса фуқароларни эмламасликка қарор қилган эди. Шунингдек, Испания ҳам AstraZeneca вакцинасини кексалар учун қўллашдан бош тортган.
Эслатиб ўтамиз, немис мутахассислари AstraZeneca вакцинасини 65 ёшдан ошганларга тавсия этмаган. Мутахассисларнинг таъкидлашича, 65 ёшдан ошганлар учун препаратнинг самарали эканига оид далиллар етарли эмас. Компания эса ушбу маълумотларни «мутлақо нотўғри» деб атаган ҳамда Буюк Британиянинг вакцинация ва иммунизация бўйича бирлашган қўмитаси томонидан AstraZeneca’ни кексаларда қўллаш маъқуллангани ва эмланганларда иммунитет миқдори ортаётганини таъкидлаган.
Мавзуга доир:
Изоҳ (0)