Майли Сайрус саҳнадан қўрққани учун даволанганини тан олди. Қўшиқчи The New York Times газетасига берган интервьюсида фобияни енгишга EMDR (кўз ҳаракатлари орқали десенситизация ва қайта ишлаш) усули ёрдам берганини айтди.
EMDR — посттравматик стресс бузилишларини даволаш учун ишлаб чиқилган психотерапия усулидир. У миянинг ўтмишда бошдан кечирган салбий тажрибалари ва травматик воқеаларни ҳозирги вақтда қайта ишлашга асосланган.
Сайрус ўзининг даволаниши қандай кечганини тасвирлаб берди. Психотерапевт қўшиқчини гипноз ҳолатига туширган, сўнгра ундан ўзини поездда ўтиргандек тасаввур қилишни ва худди кино кўраётгандек ўзини кузатишни сўраган. Шу пайтда Сайрус саҳнада уни қамраб оладиган хавотир туйғусини тасвирлаши керак эди. “Мен шунчаки улар мени жуда яхши кўришларини хоҳлайман”, деб жавоб берди қўшиқчи.
Сайрус охир-оқибат ўзини Монтанадаги тоғ чўққисида тасаввур қилганини ва у ерда “кўп жароҳатларни бошдан кечирганини” эслайди. “Мен у ерда ўзим яхши кўрган палтода кичкина қизалоқ бўлиб турганимни кўрдим”, дейди қўшиқчи. Унинг сўзларига кўра, атрофида “унга хотиржамлик ва муҳаббат келтирган одамлар” бўлган. Ёнида бувиси, онаси, севгилиси ва бир неча йил олдин вафот этган ити бор эди. Уларнинг барчаси “қўл ушлашиб туришарди”.
“Мен шундай қилиб бу ҳолатдан чиқдим ва шундан кейин ҳеч қачон саҳнадан қўрқмадим”, деб тан олди Сайрус. У бу даволаш усули “унинг ҳаётини қутқарганини” қўшимча қилди.
Изоҳ (0)