Арманистон президенти Армен Саркисян касалхонага тушиб қолди. Бу ҳақда маҳаллий «Грапарак» газетаси маълумотига таяниб, «Интерфакс» хабар қилди.
«Президентнинг юрагида муаммолар кузатилган. У ‘Астхик’ тиббиёт марказига даволаш учун ётқизилган, юракка стенд қўйиш бўйича жарроҳлик амалиёти амалга оширилмоқда», – дейилади хабарда.
Президент матбуот хизмати Армен Саркисян коронавирусдан тузалганидан кейин касалликдан қолган асоратлар унинг соғлиғига салбий таъсир кўрсатганини билдирган.
«Президент коронавирусдан тузалганидан кейин ҳам унда касаллик асоратлари сақланиб қолган. Айни вақтда у ‘Астхик’ тиббиёт марказида текширувлардан ўтмоқда», – дейилади Арманистон президентининг матбуот хизмати тақдим қилган ахборотда.
Эслатиб ўтамиз, 1 мартда Арманистонда бош вазирга қарши намойишчилар ҳукумат биносига бостириб киргани, кейинчалик Ереванда полиция Арманистон президенти Армен Саркисяннинг қароргоҳини қатъий қўриқлов остига олгани ҳақида хабар берилган. Шунингдек, Арманистон президенти бош вазир Никол Пашинян томонидан таклиф қилинган Бош штаб бошлиғи Оник Гаспарян истеъфоси ҳақидаги фармон лойиҳасини икки марта рад этгач, Бош штаб бошлиғи қонуний тартибда лавозимидан озод этилган. Фармон эълон қилингандан сўнг мамлакат раҳбари Армен Саркисян Конституциявий судга мурожаат қилиб, ундан 2018 йилда киритилган «Ҳарбий хизмат ва ҳарбий хизматчиларнинг мақоми тўғрисида»ги қонунга киритилган ўзгартиришларнинг конституцияга мувофиқлигини текширишни сўраган.
Изоҳ (0)