Словакия соғлиқни сақлаш вазири Марек Крайчи Россиянинг «Спутник V» вакцинаси сотиб олиниши туфайли ҳукуматда юзага келган келишмовчиликларга нуқта қўйиш учун истеъфога чиқди, деб ёзади Meduza.
Словакия бош вазири Игорь Матович Крайчига соғлиқни сақлаш вазири сифатида қилган меҳнатлари учун миннатдорлик билдирди ва унинг ишдан кетишини «тарихдаги энг мантиқсиз истеъфо» деб атади.
Словакия Европа Иттифоқида «Спутник V»ни Европа дори-дармон агентлиги (EMA) маъқуллашидан олдин тасдиқлаган Венгриядан кейинги иккинчи мамлакатга айланганди. Вакцинанинг биринчи партияси мамлакатга 1 март куни етиб келган.
«Спутник V»га буюртма бериш Словакиянинг ҳукмрон коалициясида тортишувларга сабаб бўлди. Коалициядаги тўртта партиядан иккитаси EMA’нинг рухсатини кутишни талаб қилди. Улар Крайчи ва Матовичнинг истеъфосини талаб қилиб, уларга коалициядан чиқиб кетиш билан таҳдид қилди. Муҳокамалардан сўнг коалиция аъзолари фақат Крайчининг истеъфоси етарли бўлишига эътироз билдирди.
Эслатиб ўтамиз, 3 март куни Словакия бош вазири Матович коронавирусга қарши «Спутник V» вакцинаси эвазига Россияга Украинанинг Закарпате вилоятини бермоқчилигини айтиб, ҳазил қилганди. Украина ташқи ишлар вазирлиги Матовичдан айтган сўзлари учун расмий равишда кечирим сўрашни талаб қилди. Матович «ноўрин гапи» учун «барча украиналиклардан» кечирим сўради.
Жонс Ҳопкинс университети маълумотларига кўра, пандемия бошидан бери Словакияда 331 минг киши коронавирусга чалинган, 8 мингдан зиёд киши касалликдан вафот этган. Март ойида Евроиттифоқ мамлакатлари ичида инфекциядан энг кўп ўлим ҳолати Словакияда қайд этилди.
Аввалроқ мамлакатда 3 мартдан комендантлик соати жорий этилиши ва аҳолига респиратор тақиш мажбурияти юкланиши ҳақида хабар берилганди.
Изоҳ (0)