Қандай шимлар семиз кўрсатади? Кийиш тавсия этилмайдиган 7 та модель (фото)

Қомат қанчалар чиройли ёки аксинча бўлишига қарамай, танланган кийимлар тўладан келган ёки озғин қилиб кўрсатиши мумкин. Қуйида тавсия этилган моделлардан ҳам иложи борича узоқроқ бўлган маъқул. Сабаби улар ҳар қандай гўзал хонимни одатдагидан тўлароқ кўрсатиш хусусиятига эга.

Анча вақт давомида урфда бўлган қаламча бичимидаги шимлар ҳам қоматни семиз қилиб кўрсатади. Гарчи бу каби шимлар ҳозир трендда бўлмаса-да, ундан ҳали воз кечмаган қизлар бор. Белдан пастга торайиб кетган ушбу шим ҳажмни борича таъкидлайди ва кўпроқ эътиборни жалб этади.

Жинси шимдаги ортиқча чўнтак, безак, йиртиқ ёки ямоқлар ҳам қоматни мислсиз даражада семиз кўрсатади. Ортиқча вазнга эгадек кўринишни истамаганларга иложи борича ортиқча деталлари кам бўлган шимлар тавсия этилади.

Шим танлашда уларнинг қулайлиги, сифати билан бирга, матосига ҳам алоҳида эътибор қаратиш лозим. Айниқса, ёрқин ҳамда ялтироқ матолиларидан эҳтиёт бўлиш зарур. Айнан белнинг пастки қисми тепасига қараганда мос бўлмаган даражада кўринишни хоҳламайдиганлар ялтироқ шим кийиш қароридан воз кечиши керак. Ялтироқ матолар ўзида ёруғликни яхши акс эттиргани туфайли ҳам кўринишни аслидан кўра семиз қилиб кўрсатади.

Тиззадан бироз пастга тушиб турувчи шимлар бўйи ёки оёғи узун қизлар учун айни муддао. Аммо бироз паст бўйлилар учун бунинг тескариси бўлиши мумкин. Бу каби бичимдаги шимлар тўпиқ қисмда тугаб, паст бўйли аёлларни думалоқ шаклда кўрсатади. Бундай кўринишни баланд пошналар ҳам тўғрилай олмайди. Шунинг учун шим танлашда ҳар бир хусусиятни инобатга олишни унутмаслик лозим.

Шимнинг бел айланаси жуда пастда бўлса, бўксани бироз семиз, оёқларни эса қисқартириб кўрсатади. Шунинг учун ҳам бу каби моделлар фақат баланд бўйли қизлар учун тавсия этилади. Сабаби улар пастроқ кўринишда бўлишни хоҳлайди.

Катта ва аниқ нақшли шимлар ҳам атрофдагиларнинг эътиборини ўзига тортади ҳамда оёқларни янада семиз қилиб кўрсатади. Нафақат шим, балки ҳар қандай либосни майда гулли, вертикал чизиқли ёки хирароқ нақшлиларини кийиш тавсия этилади.

Қора ранглар озғин, оч ранглар эса аксинча кўрсатади, деган фикр мавжуд. Бу, албатта, ранг билан бирга унинг матосига ҳам боғлиқ. Шунинг учун шим танлаганда унинг ранги ва матоси тепа қисм билан уйғунлаша олиши керак.

Албатта, кенг шимлар ҳозир трендда. Лекин уларнинг ўртача кенгликдагилари меъёрий кўриниш ҳосил қилади. Катта ҳажмда тикилганлари эса ўз-ўзидан қоматда номутаносибликлар келтириб чиқаради.