Қишки қалин ва қўпол либослардан чарчаган аёл-қизлар, баҳорда ҳар доимгидан ҳам бошқачароқ кўриниш, тамоман бошқача имижга эга бўлмоқчи бўлади. Ўзгаришга қарор қилган, аммо ишни нимадан бошлашни билмаётганлар учун эса мультфильмлардаги маликалардан илҳомланиш тавсия қилинади.
Ариэль
Ариэлники сингари аёлларга хос жозибали кўрсатадиган оч кўк либос нафақат кундалик сайрлар, балки ресторанга бориш учун ҳам айни муддао. Енглари кенг ва белга урғу берадиган блузкага мосланган кенг юбка атрофдагиларни бееътибор қолдирмаслиги аниқ. Оёқ кийим сифатида балетка танлаш ва сочларни боғичли заколка билан йиғиш образни эсда қоларли бўлишига сабабчи бўлади.
Рапунцель
Рапунцель услубида кийиниш учун енглари фонар шаклидаги оч пушти рангли либос устидан худди шу рангдаги корсет кийинг. Ноодатий пойабзал ва аксессуарлар билан образни якунланг.
Золушка
Золушка услубида кийиниш ресторан ёки театрларга бориш ёки баҳорда шунчаки сайр қилиш учун ҳам аъло вариант. Бунинг учун кенг бичимли либос, атлас матодан тикилган қўлқоплар билан минимал услубдаги тақинчоқлардан фойдаланинг.
Мулан
Мулан услубида кийиниш айниқса, кундалик образлар учун яхши танлов. Мош ранг куртка билан қора чарм этик ва юпқа свитерни мослаб бемалол кечки салқиндаги сайрларга чиқишингиз мумкин.
Белл
Соҳибжамол Белл услубида кийиниш учун эса ёқалари кенг бўлган блузка устидан жинси матоли кўйлак ёки сарафан кийинг. Қулай балетка кийиш ва романтик кўринишингизга сабаб бўладиган тақинчоқ тақишни унутманг.
Покахонтас
Жасур Покахонтас сингари кийиниш учун, елканинг бир томони ёпиқ турадиган кўйлак устидан қалин камар тақинг. Қулай пойабзал ва оловранг тошли занжир сизни бошқалардан ажралиб туришингизга сабабчи бўлади.
Изоҳ (0)