Кюлотлар — бугунги кунда урфда бўлган замонавий шимлардан бири. Такрорланмас образ яратиш учун уларни қандай кофталар билан кийиш керак? Ушбу саволга жавобни Кейт Миддлтон яратган образлар орқали топиш мумкин.
Бел қисмида катта оқ тугмачалари мавжуд тўқ рангдаги кюлотлар денгизчилар либосига ўхшаш кофталар билан ажойиб комбинацияни ҳосил қилади. Ушбу образни эса баланд пошнали туфли ҳамда кичик ҳажмдаги сумкалар янада бойитади.
Мазкур бичимдаги кюлот юқоридагига ўхшаш, аммо бичим ва тасвир борасида бир оз бошқача кофта билан уйғунлаштирилган. Шунингдек, оқ крассовка билан кундалик услуб учун ажойиб образ яратилган.
Одатда кюлотлар билан янгича образ яратиш қийинчилик туғдирмайди. Масалан, малларангдаги шимни оқ кофта ҳамда крассовка билан бирлаштириш расмий ва спорт услубларининг аралашмаси ҳисобланади. Қолаверса, муҳим расмий учрашувлар учун шунчаки пошнали оёқ кийим кийиш кифоя.
Офис ва бошқа жойда ишловчи аёллар учун ҳам қулай бўлган кюлотларни оқ холли қора кофта билан бирлаштириш тавсия этилади. Сабаби урфдан қолмайдиган бу каби холли кофталарни ҳар қандай аёл гардеробидан топиш мумкин. Образ эса барчага маъқул келиши шубҳасиз.
Ранглар орасига яқинда қўшилган хаки ва унга умуман мос бўлмаган бақлажон рангдан ҳам кутилмаган янгича образ ҳосил қилиш мумкин. Енгил свитер, қоматни алоҳида таъкидловчи кюлот ва унга мос пойабзал Кейтни янада нозик аёлга айлантирган.