Ўзбекистонда Қозоғистоннинг QazCovid-in вакцинаси ишлаб чиқарилиши мумкин

Қозоғистон соғлиқни сақлаш вазири Алексей Сой Ўзбекистон Соғлиқни сақлаш вазирлиги раҳбари Абдуҳаким Хожибоев Ўзбекистондаги фармацевтика корхоналаридан бирида Қозоғистоннинг QazCovid-in вакцинасини ишлаб чиқариш имкониятини кўриб чиқишни таклиф қилди. Бу ҳақда «Kursiv.kz» хабар берди.

Хабарга кўра, Қозоғистон бош вазири ўринбосари Эрали Туғжанов ўзбекистонлик ҳамкасбларини Қозоғистоннинг юқори технологик тиббий хизмат кўрсатувчи етакчи тиббиёт марказларига ташриф буюришга, бирламчи тиббий ёрдам муассасалари даражасида ахборот технологияларининг жорий этилиши, шунингдек, фармацевтика ишлаб чиқариши билан танишишга таклиф қилган.

«Биз эпидемияга қарши курашда шерикликни фаоллаштиришни, бундай ҳолатларга тезкорлик билан жавоб бериш нуқтаи назаридан самарали ўзаро алоқаларни яратишни, шунингдек, мавжуд эпидемия ҳолати ва уни барқарорлаштириш бўйича олиб борилаётган чора-тадбирлар тўғрисида доимий маълумот алмашишни йўлга қўйишни таклиф қиламиз» — деган Қозоғистон соғлиқни сақлаш вазири Алексей Сой.

Эслатиб ўтамиз, сентябрь ўрталарида Қозоғистонда Фан қўмитасининг Биологик хавфсизлик муаммолари илмий-тадқиқот институтида яратилган коронавирус инфекциясига қарши QazCovid-in вакцинасининг клиник синовлари бошланганди. Декабрь ойига келиб ушбу вакцинанинг III босқич клиник синовларини ўтказиш бошланди. Унинг дастлабки самарадорлиги 96 фоизга баҳоланмоқда. QazCovid-in вакцинаси билан аҳоли оммавий равишда эмлаш 2021 йил март ойидан бошланиши айтилган.

Қозоғистон аҳолиси 1 февралдан бошлаб коронавирусга қарши Россиянинг «Спутник V» вакцинаси билан эмланмоқда. Мамлакатга вакцинанинг биринчи партияси  бир марталик импорт рухсатномаси асосида етказиб берилган. Ушбу вакцина Қозоғистонда февраль ойи ўрталарида рўйхатдан ўтказилди. Ҳозирда Россиянинг вакцинаси Қозоғистондаги Қарағанда фармацевтика мажмуаси томонидан ишлаб чиқарилмоқда.

Айни пайтда Ўзбекистонда ZF-UZ-VAC 2001 вакцинаси фойдаланиш учун рўйхатдан ўтказилган. Ўзбекистон ушбу вакцинани ишлаб чиқаришда Хитойнинг Zhifei Longcom Biopharmaceutical Co. Ltd компанияси билан ҳаммуаллиф ҳисобланади.