Наманган шаҳри таркибида яна бир туман — Янги Наманган тумани ташкил этилади. Бу ҳақда халқ депутатлари вилоят кенгашининг бугун бўлиб ўтган навбатдаги сессиясида сўз борди, дея хабар беради «Дарё» мухбири Азизбек Абдувалиев.
Сессия кун тартибига халқ депутатлари Наманган шаҳар кенгашининг жорий йил 4 мартдаги вилоят марказидаги айрим фуқаролар йиғинлари ҳудудларини янги ташкил этилаётган Янги Наманган туманига ўтказиш ҳақида қарорини тасдиқлаш масаласи киритилди.
Сессияда маъруза қилган вилоят ҳокимининг ўринбосари Саидаҳмад Султоновга кўра, вилоят ҳудудида бошқарувни тизимли йўлга қўйиш, аҳоли учун ижтимоий ва маиший қулайликлар яратиш ҳамда Наманган шаҳрини ижтимоий-иқтисодий ривожлантириш учун шундай таклиф киритилмоқда.
Янги ташкил этилаётган туманнинг умумий ер майдони 8223 гектарни ташкил этади. Таркибига шаҳардаги 24 та маҳалла ҳудудини ўтказиш кўзда тутилмоқда. Ушбу маҳаллаларда бугунги кунда 145 минг киши истиқомат қилмоқда.
Улар қаторида Президентнинг Наманганга ташрифи давомида кўздан кечирилган ва ҳолати танқид остига олинган «Бунёдкор» маҳалласи ҳам бор.
Сессияда таъкидланишича, Янги Наманган тумани ташкил қилиниши муносабати билан алоҳида дастур ишлаб чиқилади. Мавжуд «Пахталиккўл» кичик саноат зонасидан ташқари яна учта — «Ёшлик», «Машад» ва «Бунёдкор» кичик саноат зоналари ташкил этилади. Уларда умумий қиймати 245 миллиард сўмлик 60 дан ортиқ лойиҳа амалга оширилиши ҳисобига 2600 та янги иш ўринлари яратилади.
Депутатлар Наманган шаҳри таркибида янги туманни ташкил этиш ҳақидаги қарорни маъқуллади. Энди бу таклиф кўриб чиқиш учун Олий Мажлисга юборилади. Парламент палаталари розилиги олинганидан сўнг эса халқ депутатлари вилоят кенгаши сессияси муҳокамасига киритилади.
Эслатиб ўтамиз, Президентнинг 2020 йил 26—27 июнь кунлари Наманган вилоятига ташрифи давомида Наманган шаҳри таркибида Давлатобод туманини қайта ташкил этиш юзасидан таклиф билдирилганди. Мазкур масала халқ депутатлари Наманган шаҳар ва вилоят кенгашлари сессияларида кўриб чиқилиб, давлат раҳбарининг ташаббуси маъқулланган.
Олий Мажлис Сенатининг 2020 йил 11 сентябрдаги «Наманган вилоятининг Наманган шаҳри таркибида Давлатобод туманини ташкил этиш тўғрисида»ги қарори билан янги туманга асос солинганди.
Изоҳ (0)