АҚШнинг Техас ва Миссисипи штатлари ҳукуматлари тиббий ниқоб тақиш мажбуриятини бекор қилди. Тадбиркорлар анъанавий иш тартибига ўтади. Оқ уй эса мазкур қарорнинг хато эканини айтди. Бу ҳақда «Коммерсантъ» хабар берди.
«Мен Техас штатининг бутунлай очилганини эълон қилдим. Шунингдек, штатда ниқоб тақиш мажбурияти ҳам бекор қилинди», — деди Техас штати губернатори Грэг Эбботт ўз Twitter саҳифасида.
«Биз тиббий ниқоб тақиш мажбуриятини олиб ташладик, тадбиркорлар ҳам тўлиқ одатий иш тартибига ўтиши мумкин», — деди Миссисипи штати губернатори Тэйт Ривз ўз Twitter саҳифасида.
Оқ уй қошидаги коронавирусга қарши курашиш ишчи гуруҳининг катта маслаҳатчиси Энди Славитт штатларнинг чекловларни бекор қилишга шошмаслиги кераклигини таъкидлади. «Биз чекловларни муддатидан олдин бекор қилиш хато деб ҳисоблаймиз. Тиббий ниқоб кўплаб ҳаётларни сақлаб қолади», — деди у CNN эфирида. Славитт штатларнинг қарорни қайта кўриб чиқишига умид билдирди.
Пандемия бошидан буён АҚШда, тахминан, 29 миллионта коронавирусга чалиниш ҳолати аниқланди. 515 мингдан ортиқ киши вирус қурбонига айланди.