Италиянинг шимолидаги Брешия шаҳрида олимлар коронавируснинг «нигерияча» штаммини аниқлади. Бу ҳақда Италия вирусологлар жамияти президенти ва микробиологик лаборатория директори Арнальдо Карузо маълум қилди, деб ёзади «РБК».
«Италияда илк маротаба биз мутацияга учраган штаммни аниқладик, бу хавотир туғдиради, чунки ушбу штамм бугунги кунда мавжуд бўлган COVID-19 вакциналарига чидамли бўлиши мумкин», — деди Карузо.
Аввалроқ Италия ҳукумати коронавирус тарқалиши сабабли жорий этилган чекловларни кучайтирган эди. Чекловлар асосан мамлакат шимолини, хусусан, Милан ва Турин шаҳарларини қамраб олди. Иккала шаҳар ҳам 1 мартдан бошлаб хавфлилик даражаси бўйича «тўқ сариқ» ҳудудлар таснифига киритилди. Худди шу тоифага мамлакатнинг марказий қисмида жойлашган ва Адриатика денгизига чиқиш имконини берадиган Марке минтақаси киритилди. Шу билан бирга, Молизе ва Базилаката ҳудудлари (мамлакатнинг маркази ва жанубида) «қизил» зоналар сифатида белгиланади. Чеклов чоралари қаторига бар ва ресторанларнинг ёпилиши, мазкур шаҳарладан чиқишни тақиқлаш киради. «Қизил» ҳудудларда мактаблар онлайн таълимга ўтади.
Таъкидланишича, чекловларнинг кучайтирлишига коронавируснинг янги турларини юқтириш ҳолатларининг ортиши сабаб бўлган.
Эслатиб ўтамиз, Нигерияда 2020 йил декабрь ойи охирида коронавируснинг янги тури аниқланди. Африка касалликлар назорати ва профилактикаси маркази директори Жон Нкенгасонг янги штамм Нигерияда коронавирусга чалинишлар сони ўсиши фонида аниқланганини айтган. Аммо касалланиш ҳолатларининг ортишига айнан янги штамм сабабчи бўлгани борасида ҳеч қандай далиллар йўқ, — дея таъкидлади Нкенгасонг.
Аввалроқ Швециялик олимлар онаси COVID-19 билан касалланган янги туғилган чақалоқ организмида SARS-CoV-2 вирусининг янги мутацияси мавжудлигини аниқлагани ҳақида хабар берилганди. Вирус геномлари текширилганда боланинг туғилишидан аввал, яъни она қорнидалиги вақтида коронавирусга чалингани аниқланган.
Дастлабки таҳлиллар она ва чақалоқнинг организмидаги вируслар бир хил эканлигини кўрсатди, бироқ бир неча кун ўтгач, шифокорлар чақалоқдаги инфекция популяцияси ўзгарганининг гувоҳи бўлди. Болада дастлабки вирусдан фарқли янги штамм мавжудлиги аниқланди.