2021 йилда тақдим қилинадиган турк сериаллари

Турк киносаноати вакиллари мавжуд пандемия вақтида ҳам янги сериал ва фильмларни суратга олишдан тўхтатгани йўқ. 2021 йилда 41 та лойиҳа тақдим этиш режалаштирилган бўлиб, улардан 18 таси телевидение, қолганлари эса рақамли платформа орқали эфирга узатилади.

«Қизил юк машинаси»

Севиндик Геркем, Чақир Усхан ва Шаҳин Баҳор иштирокидаги сериал сюжетини ўт ўчирувчиларнинг хавфли иш жараёни ва у билан боғлиқ воқеалар ташкил қилади. Шунчаки ҳамкасб эмас, бир оилага айланган жамоа аъзолари ҳаётини хавф остига қўйиб, инсонлар ҳаётини сақлаб қолади. Оддий одамларнинг қаҳрамонларча қанчадан қанча одамларга берадиган ёрдами давомида турли стресс, қийинчилик ҳамда кутилмаган ҳолатлар кузатилади.

«Маъсумлик»

Кинотанқидчилар томонидан ҳозирдан яхши баҳо берилган сериал премьераси 24 февраль куни бўлиб ўтди. 19 яшар қизи бор жуфтлик, Чақир Дениз, Гюлеч Толга, Данер Мирай, Серкай Тутунжи роль ижро қилган сериалнинг бош қаҳрамони саналади. Кунларнинг бирида бош қаҳрамоннинг собиқ севгилиси пайдо бўлади. Шундан кейин воқеалар чигаллашиб, оила ажралиш ёки муносабатларини сақлаб қолиш ҳақида қарор қилишига тўғри келади.

«Барбарос»

Айсан Жунет, Аксунгур Ўзан, Аяз Ўғуз, Алтан Дузятан суратга тушадиган мазкур сериал 2021 йилда экран юзини кўради, аммо аниқ санаси маълум эмас. Сериал Усмонли империянинг энг нуфузли пошоларидан бири Ҳайриддин Барбарос ҳақида ҳикоя қилади. Унда ушбу инсонни нафақат обрўли давлат фаоли, балки оддий инсон сифатидаги хусусиятлари, оила аъзолари билан муносабатларига ҳам урғу берилади.

«Разведка»

Сериалнинг бош қаҳрамонлари миллий разведка ташкилотининг ходимлари ҳисобланади. Сўнгги вақтда турк киносаноати вакиллари жосус ва агентлар ҳаёти ҳамда фаолиятига асосланган лойиҳаларни экранлаштирмоқда. Янги сериал разведкада фаолият юритадиган ходимларнинг қийинчилиги, муваффақиятлари ва ватанига бўлган муҳаббатини ўзида мужассам этади. Унда Чағлар Эртуғрул ва Дениз Байсал суратга тушади.

«Қардошларим»

Март ойида экран юзини кўриши режалаштирилаётган сериалда Ягту Аху, Сари Халит Озгур, Жошкин Су Бурсу суратга тушади. Сериал сюжети оддий турк оиласининг ҳаёт тарзи, муаммоларга ечим топиши ва бахтли онларни ўзида акс эттиради. Сюжетга кўра автоҳалокат туфайли ота-онасидан айрилган фарзандлар, бир-бирининг дардига малҳам бўлиши, муаммоларни мустақил ҳал қилишига тўғри келади.

«Бир куни Кипрда»

Март ойида эфирга узатилиши кутилаётган ушбу сериалда Чайоғлу Серкан, Курал Аҳмет ва «Муҳташам юз йил»даги ижроси билан яхши таниш бўлган Пелин Қорахон суратга тушади. 26 қисмдан иборат лойиҳанинг 2 ёки 3 фасл давом этиши кутилмоқда. Ҳаётий воқеаликка асосланган мазкур сериалда 1963 йилда юз берган ва тарихда Қонли Рождество сифатида қолган воқеаларни кўриш мумкин. Унда Кипрда яшайдиган турк ва юнонлар ўртасидаги кураш ҳамда муносабатларга гувоҳ бўлиш мумкин.

«Яшил қарағай»

Ўзбек мухлисларига «Ичкарида» сериалидаги роли билан яхши таниш бўлган Чиғатай Улусой, шунингдек, Афра Сарачоғлу ва Шекержи Селин иштирок этадиган мазкур сериал турк киносаноатининг «олтин асри» бўлган 1951—1974 йиллардаги воқеаларни ўзида мужассам қилади. Мухлислар уни томоша қилиш орқали машҳурлик, муваффақият ва томошабинлар севгисини қозониш осон бўлмаслиги, бунинг учун баъзида қурбонлик қилиш, қарашлар ва принципларни ўзгартиришга тўғри келишини тушуниб етиши мумкин бўлади.

«Қонунсиз ерлар»

Гунеш Угур, Авшар Хуля ўзбек мухлисларига «Зулейҳа» сериали билан таниш. Ушбу жуфтлик иштирокидаги сериални томошабинлар қонунлар амалда бўлмагани сабаб инсонлар ҳаёти барбод бўладиган Туркиянинг «қора томони»ни кўриши мумкин бўлади. Воқеалар эски анъаналарга мувофиқ ҳаёт кечирадиган мамлакатнинг шарқий қисмида юз беради. Сериал қаҳрамони ноҳақликларга қарши адолат, ҳаққонийлик билан қарши чиқадиган, ўзи ҳамда яқинларини ҳимоя қилиши учун бир қанча қийинчиликларни босиб ўтишига тўғри келадиган ва бу йўлда ўз севгисини учратадиган инсон бўлади.

«Ойна ортидаги қиз»

Ушбу сериалда Буржу Бирижик билан бирга «Элчининг қизи» сериалидаги роли билан яхши таниш бўлган Ураз Кайгилароғлу бош қаҳрамон ролини ижро қилиши керак бўлган. Аммо актёр Эршан Кунерининг Netflix учун суратга олинадиган лойиҳасида иштирок этиш учун бундан бош тортган. «Ойна ортидаги қиз» машҳур психотерапевт Гулсерен Будайижиўглунинг китоби асосида суратга олинади. Гулсерен қаламига мансуб OGM Pictures томонидан суратга олинган «Маъсумлар хонадони» ва «Қизил хона» сериаллари машҳурликка эришишга муваффақ бўлган. Унда нафақат қизиқарли воқеалар ривожи, балки ҳар бир инсон ҳаёти давомида дуч келиши мумкин бўлган психологик муаммоларга эътибор қаратилади.