Los Angeles Times «Олтин глобус» мукофотини топширувчи Голливуд хорижий матбуот ассоциациясининг (HFPA) молиявий схемаларига оид мақолани эълон қилди. Газетанинг ёзишича, ассоциация аъзоларининг гонорарлари миқдори АҚШ қонунчилигига мос келмайди, деб хабар беради «Кинопоиск».
Нашр маълумотларига кўра, HFPA’нинг 87 нафар иштирокчиси нотижорий ташкилотлар ўлчови бўйича жуда катта миқдорда пул олади. 2021 йилнинг июнида якунланадиган жорий молиявий йил давомида HFPA ўз аъзоларига 2,15 миллион доллар ажратган. Ҳисоб-китобларга кўра, январь ойида 20 дан ортиқ одам хориж фильмларини томоша қилгани учун 3465 доллардан олган. Бундан ташқари, қўмита аъзолари сафарлар сабаб ҳар ой 2310 доллардан ишлайди, архив қўмитаси аъзолари эса 2200 доллардан, фестиваль қўмитаси аъзолари — 1100 доллардан, тарихий қўмита аъзолари — 1000 доллардан.
Шунингдек, мақолада ёзилишича, матбуот анжуманлар модераторлари ҳам ёдга олинган: улар ҳар ой 1200 доллардан ишлаб топади. Ўтган молиявий йилда веб-сайтдаги мақолалар иштирокчиларга 585 минг доллар олиб келган.
Бундан ташқари, HFPА директорлар кенгаши таркибига кирганлар учун ҳам яхшигина пул тўлайди. Унинг беш нафар аъзоси 2019 йилнинг 30 июнида якунланган солиқ йилида 63 минг доллардан 136 минг долларгача маош олган. Ушбу давр мобайнида директорлар кенгаши раҳбари 23 минг доллардан 78 минг долларгача олган.
Газетадан иқтибос келтирган экспертлар ушбу маблағларни солиқлар тўловидан озод этилган ташкилот учун «ноодатий» деб атаган. Инсайдерларнинг таъкидлашича, HFPA аъзоларининг гонорарлари, тахминан, 10 йил олдин, журналистика бозори иқтисодий таназзулни бошидан ўтказишни бошлаган вақтда ўса бошлаган.
Шунингдек, Los Angeles Times’нинг қайд этишича, «Олтин глобус»га даъвогарлар қаторига кириш ҳам кўпинча HFPA’нинг илиқ муносабатларига боғлиқ. Мисол сифатида газета матбуотда кўплаб салбий фикрлар билдирилган «Эмили Парижда» сериалини келтирган — у иккита номинацияда, жумладан, «Энг яхши комедик сериал» йўналиши бўйича мукофотни қўлга киритган. Нашр маълумотларига кўра, ўтган йили Paramount ТV HFPA аъзоларини Франциядаги суратга олиш ишларига жалб этган ва уларни қиммат меҳмонхоналарга жойлаштирган.
HFPA’га яқин бўлганлардан бири Variety билан суҳбатда ташкилот аъзолари ўз ваколатлари доирасида бўлган хизматлар учун бонуслар олишини тахмин қилган. Унинг ҳисоблашича, бу каби ҳолатда улар ёлланма ходим сифатида ишлай олади.
Бу HPFA билан боғлиқ биринчи можаро эмас. Ўтган йили норвегиялик журналист Керсти Флаа «Олтин глобус» ташкилотчиларини ўзини ассоциация таркибига қабул қилишни истамагани учун судга берганди. У HFPA’ни пресс-тадбирларни назорат қиладиган картел деб ёзганди. Ноябрь ойида суд журналистнинг даъвосини рад этган.
Изоҳ (0)