2001 йилда «Гарри Поттер ва ҳикматлар тоши» ва «Узуклар ҳукмдори» фильмлари намойиш этилган. Дунё бўйлаб машҳурликка эришган фильмларнинг 20 йиллиги шарафига Empire журнали Гарри Поттер ва Фродо Бэггинс ролини ижро этган Дэниэл Рэдклифф ва Элайжа Вуд билан суҳбатлашди. Бу ҳақда «Кинопоиск» маълум қилди.
Фродо ва Гарри бир-бирини танийдими?
Рэдклифф ва Вуд Empire’га интервью беришдан олдин фақатгина бир марта «Гарри Поттер» фильмининг суратга олиш майдончасида кўришган. Ўшанда Вуд Питер Жексон билан ташриф буюрган эди. Рэдклиффнинг ёши 13, Вудники 22 да бўлган.
https://www.instagram.com/p/CLMzZb0BOc4/?utm_source=ig_embed
«Гарри Поттер» ва «Узуклар ҳукмдори» фильмлари мусобақалашгани ростми?
Оммавий ахборот воситалари доимий равишда иккита франшизани бир-бирига қарши қўйиб, томошабинлар ўртасида рақобат туйғусини пайдо қилди. Бироқ актёрлар ҳеч қачон рақобатни сезмаган. Тўғри, кўплаб томошабинлар 2000 йилларнинг бошларида параллел равишда чиқарилган франшизаларни чалкаштириб юборган ва актёрларни ҳам бир-бири билан адаштирган. Рэдклиффнинг таъкидлашича, иккисининг ҳам бўйлари паст, мовий кўз ва жигарранг соч бўлса-да, уларни аслида бир-бирига ўхшаш жиҳати йўқ. Японияда бўлиб ўтган тақдимотда Рэдклифф ҳаттоки «Узуклар ҳукмдори» фильми суратига «Мен Элайжа Вуд эмасман» деб ёзган эди.
«Гарри Поттер» Рэдклиффнинг болалигини ўғирладими?
Реклиффнинг сўзларига кўра, у ва унинг ҳамкасблари шу қадар кўп ижод қилганидан машҳурликнинг ҳаётига таъсирини англашга ҳам улгурмаган. Актёр суратга олиш ишларидан кейин бор-йўғи бир чоракка бўлса ҳам мактабга қайтишни ёмон кўрар эди. «Менинг болалигим одатдагидек ўтган, деб айта олмайман, лекин у жуда қизиқарли ва муҳаббатга тўла эди. Мен ўрта синф инглиз боласи эдим ва бошқа болалар қатори мактабга борардим. Суратга олиш майдончасида эса умуман бошқа табақадаги одамлар бор эди ва бу менга дунёни янада кенгроқ тушунишга ёрдам берди».
Гарри Поттер ҳақидаги «Афсунгарлар тоши» фильми суратга олинишдан аввал Рэдклифф дастлаб икки картина учун шартнома имзолаган. Ўша вақтда унинг ўзи ҳали Ж.К. Роулингни китобларини ўқимаган эди. Актёр узоқ ва кенг кўламли лойиҳанинг бир қисмига айланаётганини сезмаган, бироқ йиллар давомида у асарни ёқтириб қолди. Ҳар йили унинг ота-онаси суратга тушишни давом эттирасанми, дея сўрар, актёр «ҳа» деб жавоб берар эди.
Рэдклиффнинг сўзларига кўра, «Гарри Поттер» унга ҳаётда нима хоҳлаётганини эрта англаб етиши учун ниҳоятда фойдали бўлган. Бироқ баъзи саҳналарни ижро этишдан ҳам уялган. Шунингдек, дастлабки муваффақият унга молиявий мустақиллик ва турли хил лойиҳаларда иштирок этиш имкониятини берган.
Қайси саҳналарни суратга олиш қийин бўлган?
Рэдклифф учун франшизанинг энг қийин қисми тўртинчи фильмдаги сувости саҳналари бўлган. Ушбу жараённи суратга олиш 6 ҳафта давом этган. Чунки техник гуруҳ ҳар куни 10 сонияни суратга олишга муваффақ бўлган. Умуман олганда, актёр фильмни суратга олишда 41 соат сув остида бўлган, бундан олдин у дайвинг курсини ҳам тугатган.
Рэдклифф «Узуклар ҳукмдори», Вуд эса «Гарри Поттер» ҳақида қандай фикрда?
Дэниэл Рэдклифф «Узуклар ҳукмдори» фильмини Гарри Поттер ижодкорлари учун махсус намойишда томоша қилди ва ҳамкасбининг ижросига қойил қолди. Вуд эса Янги йил байрами арафасида оила даврасида Гарри Поттер фильмини томоша қилди ва фильм унга ёқди.
Актёрларнинг 11 сентябрь воқеалари ҳақидаги хотиралари қандай?
Иккала фильм ҳам 2001 йил 11 сентябрь воқеаларидан кейин экранларга чиққан. Фожиа содир бўлган куни Вуд Шон Бин ва Oрлондo Блум билан Нью-Йоркдан Лос-Анжелесга учиб келган ва дераза орқали осмонўпар бинонинг қандай ёнаётганини кўрган. Учувчи йўловчиларга самолётлар террорчилар томонидан ўғирлаб кетилгани ва Синсиннати шаҳрига қўнганини айтган. Шунинг учун ҳам барча рейслар бекор қилинганлиги сабабли актёрлар бир ҳафта давомида қолиб кетган. Фожиадан кейин Warner Bros «Гарри Поттер» актёрлари учун шахсий самолётларни ёллаган.
Ҳозирда франшиза актёрларда қандай ҳис-туйғуларни уйғотмоқда?
Актёрлар фильмлар одамларга ёрдам беришда давом этаётганидан мамнун. Рэдклиффнинг сўзларига кўра, Гарри Поттер ҳақидаги фильмнинг еттинчи қисмидаги муваффақиятсиз трюкдан сўнг фалаж бўлган каскадёр – Дэвид Холмснинг бир ойлик оғир операциясига «Узуклар ҳукмдори» ёрдам берган. Вуднинг танишига эса Голлумнинг ҳикояси гиёҳвандликнинг енгишга ёрдам берган.
Вуд ва Рэдклифф уларнинг иштирокисиз яратилган кейинги лойиҳалар ҳақида қандай фикрда?
Amazon’нинг «Узуклар ҳукмдори»деб номланган янги сериали Вуд учун жуда ғалати туюлди. «Бу ‘Узуклар ҳукмдори’ эмас. У иккинчи асрда, биз айтган воқеалардан минг йил аввал содир бўлади», − дейди Вуд. Шунингдек, у испан режиссёри Хуан Антонио Баённи ёқтиргани ва ижодкорлар трилогияга нисбатан давомийликни сақлаб, суратга олиш ишларини Янги Зеландияда ташкил этишини таъкидлади. Рэдклифф эса «Гарри Поттер» дунёси кенгайишда давом этаётганидан хурсанд. Лекин иккала актёр ҳам яқин йилларда франшизага қайтишни режалаштирмаяпти.
Изоҳ (0)