2021-yilda taqdim qilinadigan turk seriallari

Turk kinosanoati vakillari mavjud pandemiya vaqtida ham yangi serial va filmlarni suratga olishdan to‘xtatgani yo‘q. 2021-yilda 41 ta loyiha taqdim etish rejalashtirilgan bo‘lib, ulardan 18 tasi televideniye, qolganlari esa raqamli platforma orqali efirga uzatiladi.

“Qizil yuk mashinasi”

Sevindik Gerkem, Chaqir Usxan va Shahin Bahor ishtirokidagi serial sujetini o‘t o‘chiruvchilarning xavfli ish jarayoni va u bilan bog‘liq voqealar tashkil qiladi. Shunchaki hamkasb emas, bir oilaga aylangan jamoa a’zolari hayotini xavf ostiga qo‘yib, insonlar hayotini saqlab qoladi. Oddiy odamlarning qahramonlarcha qanchadan qancha odamlarga beradigan yordami davomida turli stress, qiyinchilik hamda kutilmagan holatlar kuzatiladi.

“Ma’sumlik”

Kinotanqidchilar tomonidan hozirdan yaxshi baho berilgan serial premyerasi 24-fevral kuni bo‘lib o‘tdi. 19 yashar qizi bor juftlik, Chaqir Deniz, Gyulech Tolga, Daner Miray, Serkay Tutunji rol ijro qilgan serialning bosh qahramoni sanaladi. Kunlarning birida bosh qahramonning sobiq sevgilisi paydo bo‘ladi. Shundan keyin voqealar chigallashib, oila ajralish yoki munosabatlarini saqlab qolish haqida qaror qilishiga to‘g‘ri keladi.

“Barbaros”

Aysan Junet, Aksungur O‘zan, Ayaz O‘g‘uz, Altan Duzyatan suratga tushadigan mazkur serial 2021-yilda ekran yuzini ko‘radi, ammo aniq sanasi ma’lum emas. Serial Usmonli imperiyaning eng nufuzli posholaridan biri Hayriddin Barbaros haqida hikoya qiladi. Unda ushbu insonni nafaqat obro‘li davlat faoli, balki oddiy inson sifatidagi xususiyatlari, oila a’zolari bilan munosabatlariga ham urg‘u beriladi.

“Razvedka”

Serialning bosh qahramonlari milliy razvedka tashkilotining xodimlari hisoblanadi. So‘nggi vaqtda turk kinosanoati vakillari josus va agentlar hayoti hamda faoliyatiga asoslangan loyihalarni ekranlashtirmoqda. Yangi serial razvedkada faoliyat yuritadigan xodimlarning qiyinchiligi, muvaffaqiyatlari va vataniga bo‘lgan muhabbatini o‘zida mujassam etadi. Unda Chag‘lar Ertug‘rul va Deniz Baysal suratga tushadi.

“Qardoshlarim”

Mart oyida ekran yuzini ko‘rishi rejalashtirilayotgan serialda Yagtu Axu, Sari Xalit Ozgur, Joshkin Su Bursu suratga tushadi. Serial sujeti oddiy turk oilasining hayot tarzi, muammolarga yechim topishi va baxtli onlarni o‘zida aks ettiradi. Sujetga ko‘ra avtohalokat tufayli ota-onasidan ayrilgan farzandlar, bir-birining dardiga malham bo‘lishi, muammolarni mustaqil hal qilishiga to‘g‘ri keladi.

“Bir kuni Kiprda”

Mart oyida efirga uzatilishi kutilayotgan ushbu serialda Chayog‘lu Serkan, Kural Ahmet va “Muhtasham yuz yil”dagi ijrosi bilan yaxshi tanish bo‘lgan Pelin Qoraxon suratga tushadi. 26 qismdan iborat loyihaning 2 yoki 3 fasl davom etishi kutilmoqda. Hayotiy voqealikka asoslangan mazkur serialda 1963-yilda yuz bergan va tarixda Qonli Rojdestvo sifatida qolgan voqealarni ko‘rish mumkin. Unda Kiprda yashaydigan turk va yunonlar o‘rtasidagi kurash hamda munosabatlarga guvoh bo‘lish mumkin.

“Yashil qarag‘ay”

O‘zbek muxlislariga “Ichkarida” serialidagi roli bilan yaxshi tanish bo‘lgan Chig‘atay Ulusoy, shuningdek, Afra Sarachog‘lu va Shekerji Selin ishtirok etadigan mazkur serial turk kinosanoatining “oltin asri” bo‘lgan 1951—1974-yillardagi voqealarni o‘zida mujassam qiladi. Muxlislar uni tomosha qilish orqali mashhurlik, muvaffaqiyat va tomoshabinlar sevgisini qozonish oson bo‘lmasligi, buning uchun ba’zida qurbonlik qilish, qarashlar va prinsiplarni o‘zgartirishga to‘g‘ri kelishini tushunib yetishi mumkin bo‘ladi.

“Qonunsiz yerlar”

Gunesh Ugur, Avshar Xulya o‘zbek muxlislariga “Zuleyha” seriali bilan tanish. Ushbu juftlik ishtirokidagi serialni tomoshabinlar qonunlar amalda bo‘lmagani sabab insonlar hayoti barbod bo‘ladigan Turkiyaning “qora tomoni”ni ko‘rishi mumkin bo‘ladi. Voqealar eski an’analarga muvofiq hayot kechiradigan mamlakatning sharqiy qismida yuz beradi. Serial qahramoni nohaqliklarga qarshi adolat, haqqoniylik bilan qarshi chiqadigan, o‘zi hamda yaqinlarini himoya qilishi uchun bir qancha qiyinchiliklarni bosib o‘tishiga to‘g‘ri keladigan va bu yo‘lda o‘z sevgisini uchratadigan inson bo‘ladi.

“Oyna ortidagi qiz”

Ushbu serialda Burju Birijik bilan birga “Elchining qizi” serialidagi roli bilan yaxshi tanish bo‘lgan Uraz Kaygilarog‘lu bosh qahramon rolini ijro qilishi kerak bo‘lgan. Ammo aktyor Ershan Kunerining Netflix uchun suratga olinadigan loyihasida ishtirok etish uchun bundan bosh tortgan. “Oyna ortidagi qiz” mashhur psixoterapevt Gulseren Budayijio‘gluning kitobi asosida suratga olinadi. Gulseren qalamiga mansub OGM Pictures tomonidan suratga olingan “Ma’sumlar xonadoni” va “Qizil xona” seriallari mashhurlikka erishishga muvaffaq bo‘lgan. Unda nafaqat qiziqarli voqealar rivoji, balki har bir inson hayoti davomida duch kelishi mumkin bo‘lgan psixologik muammolarga e’tibor qaratiladi.