Футболга қизиққан, уни томоша қилишни ёқтирган инсон борки, ўйинчиларнинг трансфер бозоридаги нархини кузатиб боради. Аксарият ҳолларда барчамиз дунё трансфер бозоридаги вазиятни муҳокама қиламиз: Килиан Мбаппе ва Эрлинг Ҳоланднинг нархи кўтарилгани ёки Кришитину Роналду ҳамда Лионель Мессининг нархида пасайиш кузатилгани ҳақида гапирилади. Ўзбекистонлик футболчилар-чи? Уларга ҳам трансфер нархи қўйиладими, агар шундай бўлса, энг қиммат ўзбек футболчисининг бозордаги қиймати қанча? Қуйида айнан шу саволларга жавоб берган ҳолда Ўзбекистоннинг энг қиммат футболчилари ҳақида фикр юритамиз.
Ҳожиакбар Алижонов — 900 минг евро
Ҳожиакбар Алижонов 2016 йилдан бери «Пахтакор»нинг асосий таркибига жалб этиб келинади. Алижонов «Пахтакор»даги кучли рақобатни енгиб ўта олди ва ҳозирда асосий таркибнинг муҳим футболчиси ҳисобланади. Ҳожиакбарнинг тезкорлиги, мунтазам равишда ҳужумларга қўшилиши ва ўйинни ўзига олишдан чўчимаслиги пойтахт клубининг сўнгги йиллардаги ғалабаларида муҳим рол ўйнагани ҳеч кимга сир эмас. Алижонов агар шу йўсинда давом этса, яқин йиллар ичида терма жамоа учун ҳам кўп нарса бера олиши мумкин.
Бобур Абдухолиқов — 900 минг евро
Ўзи тарбияланган «Насаф» таркибида миллий чемпионатдаги ёрқин ўйинлари ва голлари орқали яхши танилган Бобур Абдухолиқов 2021 йилнинг февраль ойида легионерга айланди. Ҳужумчи Украина чемпионати вакили «Рух» билан шартнома имзолади, эндиликда у ўз омадини Европада синаб кўради.
Одилжон Ҳамробеков — 1 миллион евро
«Насаф» академияси тарбияланувчиси бўлган Одилжон Ҳамробеков 2013 йилдан бошлаб қаршиликларнинг асосий жамоасига жалб этила бошлаган. Шунингдек, у Ўзбекистоннинг турли ёшдаги терма жамоаларидаги ўйини орқали ҳам мухлис ва мутахассисларнинг эътиборини ўзига қаратган. Ҳамробеков ҳозирда «Пахтакор» таркибида ўз ўрнига эга бўлган асосий футболчилардан бири ҳисобланади. Унинг майдондаги асосий вазифаси жамоанинг янги ҳужумини бошлаб бериш ва рақиб ўйинчиларини зарарсизлантиришдан иборатдир.
Достон Ҳамдамов — 1,20 миллион евро
Достон профессионал фаолиятини «Бунёдкор» сафида бошлаб (2014 йилда), қисқа вақт ичида асосий таркиб футболчисига айланади ва ёрқин ўйинлар кўрсата бошлайди. Айнан шу сабаб у 2015 йилда Осиёнинг энг яхши ёш футболчиси мукофотини ҳам қўлга киритганди. 2018 йилда эса у Россиянинг «Анжи» клубига ўтди. Афсуски, Махачқалъада унинг омади юришмади, шундан сўнг (2019 йилнинг январь ойида) Достон Тошкентнинг бошқа бир клуби «Пахтакор» сафига келиб қўшилди. «Шерлар» билан шартномаси якунига етгач, эркин агент сифатида БАА чемпионатига йўл олди. Дубайнинг «Ан-Наср» клуби билан 1,5 йиллик шартнома имзолаган Достон янги жамоасида кўп вақт ўтказмади. «Ан-Наср» уни мавсум сўнггигача аутсайдер «Ҳатта«га ижарага бериб юборди.
Одил Аҳмедов — 1,20 миллион евро
Осиё Кубоги—2011 дан кейин легионерга айланган Одил Аҳмедов роппа-роса 10 йилдан бери Ўзбекистондан ташқарида тўп тепмоқда. Бу вақт оралиғида у «Анжи», «Краснодар», «Шанхай СИПГ» каби жамоаларда ҳаракат қилди. Ҳозирда эса Ўзбекистон терма жамоаси сардори ижара асосида «Тянсзин Тайгерс» (собиқ «Тяньцзинь Тэда») шарафини ҳимоя қилмоқда. Сўнгги хабарларга кўра мазкур клуб банкротлик ёқасида турибди ва катта эҳтимол билан тарқатиб юборилиши кутилмоқда.
Остон Ўрунов — 1,50 миллион евро
2020 йилнинг ёзида Россия футболида катта шов-шув кўтарган ҳолда «Уфа»дан «Спартак»ка ўтган Остон Ўрунов Москва клуби сафида ўзининг нималарга қодир эканини исботлай олмади. Пойтахтликлар эса уни қишки трансферлар вақтида яна эски жамоасига қайтариб юборди. Тўғри, Остонга кам имконият берилди, аммо у бундан фойдаланиши ва ўзини кўрсатиши шарт эди. Боиси исталган чемпионатда легионер футболчи маҳаллий ўйинчилардан бир бош устун бўлиши керак. Шу тариқа Остоннинг Россия пойтахтидаги саргузаштлари якунланди ва у эндиликда ҳаммасини бошидан бошлашига тўғри келади.
Мавзуга доир: «СУМ»даги харид, Юраннинг айблови ва «Родина»га урилган ягона гол. Остон Ўруновнинг «Спартак»даги ярим йили ҳақида
Узоқ йиллар давомида «Пахтакор» сафида (орада икки бор легионер бўлишга ҳам улгурди) тўп тепган Сергеев Самвел Бабаян бошчилигидаги терма жамоада муваффақиятсиз ўйинлар кўрсатиб, мухлислар билан «чиқишмай» қолганди. Аммо бугунги кунга келиб, у ўз позициясини тиклаб бормоқда. Суперлиганинг ўтган мавсумида 16 та гол билан тўпурарлар рўйхатида учинчи ўринни эгаллаган (Драган Черан («Пахтакор») 20 ва Бобур Абдухолиқовдан («Насаф») 17 кейин) футболчи 2021 йилнинг февраль ойида Қозоғистоннинг «Актобе» клуби футболчисига айланди. Умуман олганда, Сергеевни яхши даражадаги ҳужумчи дейиш мумкин, шунчаки у ўзига мос келадиган жамоа ва мураббий топиши керак, холос.
Азиз Ғаниев — 1,80 миллион евро
Рўзиқул Бердиев бошчилигидаги «Насаф» сафида анчайин ёш пайтида етишиб чиққан Азиз Ғаниев Қарши жамоасининг асосий ўйинчиси ҳисобланарди. Ўйинни ўзига олишдан қўрқмайдиган ва узоқ масофадан зарба беришга тортинмайдиган кам сонли ўзбекистонлик футболчилардан бири «Шабоб Ал-Аҳли» клубига йўл олди. Азиз БАА чемпионатида барқарор ўйин кўрсатаётганди, аммо биринчиликнинг 16-туридан ўрин олган учрашувда жароҳат олгани туфайли мавсумнинг қолган қисмини ўтказиб юборадиган бўлди.
Жалолиддин Машарипов — 2 миллион евро
Ўзбекистон Суперлигасининг сўнгги йиллардаги энг ёрқин ўйинчиси Жалолиддин Машариповнинг Европага кетиши кераклиги ҳақида жуда кўп гапирилди. Аммо яшил қитъа клубларидан жўяли таклиф бўлмаганидан кейин (тўғри, орада Туркиядан таклиф бўлгани ҳақида хабарлар тарқалди, аммо бу хабардан нарига ўтмади) унда араб жамоаларидан бирини танлашдан бошқа чора қолмади. Саудия Арабистонининг «Ан-Наср» клубига ўтган Машарипов янги жамоасида бирорта ҳам ўйин ўтказмасдан туриб, БААнинг «Шабоб Ал-Аҳли» жамоасига 2021 йилги мавсумнинг охирига қадар ижарага бериб юборилди. Саудия клубининг бу қарорга келишига легионерларга қўйилган тақиқ бўлгани айтилди. Шу тариқа бир пайтлар катта умид билдирилган ва ўзбек футболини янги босқичга олиб чиқиши кутилган футболчи бугун БААнинг ўртамиёна жамоасида жавлон урмоқда.
Отабек Шукуров — 2,50 миллион евро
Тошкентнинг «Бунёдкор» ва Ўзбекистоннинг турли ёш тоифасидаги терма жамоаларидаги ўйинлари орқали ўзини яхши томондан намоён эта олган Отабек Шукуров ҳам мана неча йилдирки, БАА чемпионатида тўп суриб келмоқда. Шукуров «Шаржа»нинг асосий футболчиларидан бири ҳисобланса-да, мухлислар унинг ҳам нисбатан кучлироқ чемпионатларда ўйнашини истаганди. Аммо Отабек катта эҳтимол билан легионер сифатидаги фаолиятини Арабистон ярим оролида тугаца керак. БАА биринчилигини ерга урмаган ҳолда шуни айтиш мумкинки, креатив узатмаларни амалга ошириш ва майдонни яхши кўра олиш қобилияти Отабекка у ерда ортиқча қийинчиликларсиз тўп суришга имкон бермоқда.
Элдор Шомуродов — 6,50 миллион евро
Бугунги кунда Элдор Шомуродов, шубҳасиз, ўзбек футболининг фахри бўлиб турибди. «Ростов»даги 3 йиллик фаолиятдан сўнг Италияга йўл олган Элдор тезда янги чемпионатга мослашиб кетди ва маҳаллий мухлисларнинг меҳрини қозонди. Тўғри, у 16 та ўйинда атиги 3 та гол урди, аммо шунинг ўзи ҳам ўзбек футболи учун катта натижа ҳисобланади. Элдор айни пайтда Ўзбекистоннинг энг қиммат футболчиси бўлиб турибди. ЖЧ—2022 саралаш босқичида Вадим Абрамов ҳам ўйинни айнан Шомурод атрофида қурса керак.
Мавзуга доир: Италиядан Польшагача. Ўзбекистонлик легионер футболчилар қайси давлатларда тўп сурмоқда?
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)