Енгилмас чемпионлар. Футбол тарихида бир мавсум давомида умуман мағлубиятга учрамаган чемпион жамоалар ҳақида

Англиянинг «Престон Норт Энд» клуби 1888/89 йилги мавсумда бир йилги чемпионатни мағлубиятсиз ўтказиб, ғолибликни тантана қилганди. Ўшандан кейин миллионлар ўйини сезиларли даражада ўзгарди, аммо футболда ҳар доим ҳам мукаммал жамоалар бўлавермаган, бу каби натижалар эса жуда камдан кам қайд этилган. Демак, қуйида миллий чемпионат доирасида бирорта ҳам ўйинда мағлубиятга учрамасдан ғолибликни тантана қилган жамоалар ҳақида фикр юритилади.

«Арсенал» — 2003/04 йилги мавсум

«Канонирлар» ҳанузгача Премьер Лиганинг бутун мавсумини бирорта ҳам мағлубиятсиз ўтказишга муваффақ бўлган ягона жамоа бўлиб турибди. Чемпионат бошланишидан олдин инглиз матбуотининг асосий мавзуси «Челси»нинг россиялик тадбиркор Роман Абрамович томонидан сотиб олингани бўлганди. Журналистлар фақат Лондоннинг «кўк» қисми ҳақида гапираётган бир пайтда афсонавий мураббий Арсен Венгер тарихдан жой олишга тайёрланаётган эди. Эътиборлиси, ўшанда «Арсенал»нинг таркиби ҳақиқатан ҳам мавсум бошида оптимал даражада эди. Клуб фақат «Боруссия Д»дан Йенс Леманнни сотиб олди ва ёш Сеск Фабрегасни «Барселона»ни тарк этишга кўндирди.

«Арсенал» ва «Челси» мусобақанинг асосий фаворитлари қаторида эди. Жамоалар имконияти мавсумнинг биринчи ярмида тенг даражада эди, аммо кейинчалик Венгер шогирдлари кетма-кет бешта ўйинда ғалаба қозонади. Уларга етиб олиш эса аллақачон имконсиз ишга айланганди. «Тўпчилар» асосий рақиблари билан баҳсларда ҳам жуда ишончли ўйин кўрсатади: «Челси»(2:1, 2:1) ва «Ливерпуль» (2:1, 4:2) устидан икки мартадан ғалаба, «Манчестер Юнайтед» билан эса шунча дуранг (0:0; 1:1). «Арсенал» умумий ҳисобда 90 очкони қўлга киритади ва 38 учрашувнинг 26 тасида ғалаба қозонади. Ушбу ютуқ учун клуб Премьер Лига кубогининг махсус олтин нусхасини олган.

«Милан» — 1991/92 йилги мавсум

Машҳур Арриго Сакки ишдан бўшатилгандан сўнг «Милан»ни бунгача клуб маъмурий штабида ишлаб келган ҳеч кимга номаълум Фабио Капелло ўз қўлига олди. Мухлислар ва аксарият ўйинчилар Капеллони хушламайгина кутиб олади. Катта тажрибага эга бўлмаган мутахассис юлдузлар жамоасига тушиб қолади. Матбуот ва ҳатто баъзи мухлисларининг шубҳаларига қарамай, Фабио дастлабки ўйинларданоқ шундай ўйин кўрсата бошладики, «Милан»ни мағлуб этиш деярли имконсиз вазифага айланади. Миланликлар А Серияда ғалаба қозониш билан бирга чемпионатнинг 34 та ўйинида атиги 21 та гол ўтказиб юборади. «Қизил-қоралар» айниқса асосий рақобатчилари билан ўйинларда ижобий натижалар қайд этади: «Ювентус» — 1:1; 1:1, «Торино» — 2:0; 2:2, «Наполи» — 5:0; 1:1.

Таркибида Алессандро Костакурта, Паоло Мальдини ва Филиппо Галли бўлган миланликларнинг ҳимоясига фақат ҳавас қилиш мумкин эди. Клубнинг Италия чемпионатидаги мағлубиятсиз серияси эса 58 учрашувга етади. Шундай экан, «Милан»нинг яна икки мавсум чемпион бўлганлиги ҳам ҳеч кимни ажаблантирмаса керак. Шунингдек, 25 та гол билан 1991/1992- йилги мавсумнинг энг яхши тўпурарига айланган ва жамоанинг А Сериядаги ғалабали юришини безаб берган Марко ван Бастенни ҳам эслатиб ўтиш жоиздир.

«Аякс» — 1994/95 йилги мавсум

Ўтган асрнинг 90 йилларда Амстердам клубининг порлаши бевосита Луи ван Гал номи билан боғлиқ эди. Ҳали кўпчиликка номаълум бўлган мураббий «Аякс» билан барча совринларга эга чиқади. 1991—1995 йилларда «Аякс» Нидерландия чемпионати, мамлакат Кубоги ва Суперкубоги, УЕФА Кубоги ҳамда Суперкубоги, қитъалараро Кубок ва, албатта, Чемпионлар Лигасида ғалаба қозонади.

Жамоа учун 1994/95 йилги мавсум айниқса, муваффақиятли ўтади. Ўша йили ван Гал ажойиб футболчилар тўпламини бирлаштира олганди: Эдвин ван дер Сар, Франк Райкард, ака-ука Бурлар, Кларенс Зеедорф, Эдгар Давидс, Патрик Клюйверт ва бошқа бир қатор юлдузлар. Жамоа жуда тезкор ва ҳужумкор футбол ўйин кўрсатарди. Ван Галнинг қўл остида «Аякс»нинг қанчалик яхши ўйнаганини тўплар нисбати ҳам исботлаб турибди — 106:28. Голларнинг учдан бир қисми Патрик Клюйверт ва Яри Литманеннинг ҳиссасига тўғри келганди — 35 та. Ўша йили ҳатто энг яқин таъқибчилар ҳам «Аякс»га яқин кела олмайди: ПСВ (4:1; 1:0) ва «Фейеноорд (4:1; 5:0). Фақатгина «Рода» (1:1; 1:1) мағлубиятдан қутулиб қолади.

«Ювентус» — 2011/12 йилги мавсум

2006 йилда Турин клуби келишилган ўйинларда иштирок этгани учун иккинчи дивизионга бадарға қилинади. Иккита чемпионлик унвони эса қайтариб олинади ва «Интер»га топширилади. Б Серияга тушириб юборилганидан сўнг «Ювентус» яна беш мавсум давомида чемпионликни кутишга мажбур бўлди. Клуб қуйи лигага тушиб кетганидан кейинги олтин медалини 2011 йилда Антонио Конте бошчилигида қўлга киритилади.

Гарчи жамоанинг ўйини мукаммал бўлмаса ҳам «Юве» чемпионатнинг бирорта ҳам ўйинида мағлубиятга учрамайди. Ҳимояда ҳаммаси жойида бўлса (20 та ўтказиб юборилган гол), ҳужумдагиларнинг иши унчалик юришмайди. Мавсум якунида жамоанинг бирорта ҳам футболчиси мавсумнинг энг яхши тўпурарлари рўйхатида кучли ўнликка ҳам кира олмайди. Шунга қарамай Конте шогирдлари 38 учрашувнинг 23 тасида ғалаба қозонади, яна 15 та ўйин эса дуранг билан якунланади. Таққослаш учун иккинчи ўринни эгаллаган «Милан» 24 ғалаба ва 8 дуранг қайд этади. Аммо 6 та мағлубият чемпионлик учун курашда асосий ролни ўйнайди.

Ҳужумдаги камчиликларга қарамай «Юве» 2011/12 йилги мавсумда асосий рақибларига қарши жуда яхши ҳаракат қилади: «Милан» 2:0; 1:1, «Удинезе» 0:0; 2:1 ва «Лацио» 1:0; 2:1. Конте ишдан бўшатилишидан олдин ҳам кетма-кет яна икки марта чемпионликни қўлга киритади. «Ювентус» А Серияда 2012 йилдан бери етакчиликни бой бермаяпти.

«Порту» — 2010/11 йилги мавсум

«Аждарлар» XXI аср бошларида Жозе Моуриньо қўл остида ўз тарихидаги энг яхши натижани намойиш этганди. Аммо Андре Виллaш-Боаш ҳам Португалия гранди тарихида ўзининг ўчмас изини қолдира олган ва чемпионат тарихида бирорта ҳам ўйинни ютқазмасдан чемпионликни қўлга киритган биринчи мураббийга айланган. «Порту» ҳақиқатан ҳам 2010/11 йилги мавсумда ўз тарихидаги энг яхши натижалардан бирини кўрсатади. Жамоа ўтказилган 30 ўйиннинг 27 тасида ғалаба қозониб, ишончли тарзда чемпионликни қўлга киритади. Асосий рақиблар «Бенфика» (5:0; 2:1) ва «Спортинг» (1:1; 3:2) ҳам ортиқча қаршилик кўрсата олмайди.

Лотин Америкаси вакиллари Халк ва Фалькаодан иборат бўлган тандем ушбу чемпионликни қўлга киритишда муҳим рол ўйнаган. 23 та гол билан бразилиялик мусобақанинг яхши тўпурарига айланган бўлса, колумбиялик 16 та гол билан иккинчи ўринни эгаллайди.

Португалия чемпионати Европанинг энг кучли лигаси ҳисобланмаслигини айтган ҳолда яна шуни қўшимча қилиш мумкинки, Боаш шогирдлари ўз муваффақиятли юришини Португалия Кубоги, мамлакат Суперкубоги ва Европа Лигасида ҳам давом эттирган.

Виллaш-Боаш кетгандан кейин унинг ўрнини Витор Перейра эгаллайди. Ушбу мутахассис ҳам жамоанинг даражасини ушлаб қолади ва кетма-кет икки марта чемпионликни тантана қилади. Аммо 2012/13 йилги мавсум «Порту» учун чинакамига ёрқин кечди, жамоа ўз тарихида иккинчи бор мавсум давомида бирор марта ҳам мағлубиятга учрамайди. Тўплар нисбати ҳам шунга монанд бўлади – 30 учрашувда 70 га 14. Баошнинг муваффақиятли мавсумида эса бу кўрсаткич 73 га 16 ни ташкил қилганди.

«Динамо» ва «Шахтёр»

Украина чемпионатида «Динамо» ва «Шахтёр» клублари мағлубиятга учрамаган ҳолда олтин медалларни қўлга киритган. Киевликлар уч марта шу тарзда чемпионликни тантана қилган – 1999/00, 2006/07, 2014/15 йилги мавсумларда. Биринчи марта ушбу ютуқ Валерий Лобановский даврида қўлга киритилган бўлса, кейинчалик Анатолий Демьяненко ва Сергей Ребров шундай натижага эришган.

«Шахтёр» эса фақат бир марта, 2001/02 йилги мавсумда «қуруқ» чемпионликни нишонлаган. Ўшанда «кончилар» италиялик мутахассис Невио Скала бошчилигида идеал мавсумни ўтказганди.

Нисбатан кучсизроқ чемпионатларда ҳам шунга ўхшаш ҳодисалар юз берган:

• Хорватия – «Динамо Загреб» 2014/15 йилги мавсум;
• Чехия – «Спарта» 2009/10 йилги мавсум;
• Сербия – «Партизан» 2004/05 ва 2009/10 йилги мавсумлар; «Црвена Звезда» 2007/08 йилги мавсум;
• Греция – ПАОК 2018/19 йилги мавсум;
• Арманистон – «Пюник» 2003 йилги мавсум;
• Болгария ЦСКА София 2007/08 йилги мавсум;
• Кипр – «Aпoллoн Лимассол» 2005/06 йилги мавсум; «Анортосис» 2007/08 йилги мавсум;
• Венгрия – «Дебрецен» 2011/12 йилги мавсум.

Португалия ва Сербия жамоалари ҳам мукаммал даражадаги мавсумларни ўтказади, аммо уларга ғолибликни қўлга киритиш насиб этмайди. «Бенфика» мавсум давомида 21 ғалаба, 9 та дуранг қайд этиб, ўз дарвозасидан 11 та гол ўтказиб юборади. Бироқ «Порту» чемпионат ўйинларида мағлубиятга учраган бўлса ҳам дуранглар кўплиги учун чемпионликни илиб кетади.

Шунга ўхшаш ҳолат «Црвена Звезда» билан содир бўлади. «Қизил-оқлар» 21 ўйинда муваффақият қозонади, яна 12 та баҳсда эса дуранг қайд этади. Аммо 75 очко ҳам чемпион бўлиш учун етарли бўлмайди. «Партизан» азалий рақибини 5 очкога ортда қолдириб, чемпионликни тантана қилади.