Хитой ташқи ишлар вазири Дональд Трампни Пекин ва Вашингтон алоқаларининг ёмонлашувида айблади

Сўнгги бир неча йил ичида Хитой ва АҚШ муносабатлари Американинг аввалги маъмурияти олиб борган сиёсат туфайли жиддий равишда ёмонлашди. Бу ҳақда Хитой Халқ Республикаси ташқи ишлар вазири Ван И Пекинда «Ланьтин» форуми очилишида айтиб ўтди, деб ёзади «РБК».

Вазирнинг сўзларига кўра, Америка—Хитой алоқалари сўнгги бир неча йил давомида «дипломатик муносабатлар ўрнатилганидан буён энг мураккаб вазият» билан тўқнаш келган.

«Бунинг асосий сабаби шундан иборатки, ўз сиёсий эҳтиёжларидан келиб чиқиб, АҚШ собиқ маъмурияти Хитой сиёсатини ва ривожланиш тенденцияларини нотўғри баҳолади ва нотўғри талқин қилди», — деди Ван И.

Унинг қўшимча қилишича, шунга асосланиб, Вашингтон Хитойга босим ўтказишни ва уни тийиб туришга уринишни бошлаган. Бу ўз навбатида, икки мамлакат алоқаларига жиддий зарар етказган.

АҚШ президенти Дональд Трамп маъмурияти бошқарувининг илк йилларида Хитой ва Америка муносабатларидаги бош муаммо «савдо уруши» бўлган. Вашингтондагилар хитойлик ишлаб чиқарувчилар Америка бозорининг очиқлигидан фойдаланиб, АҚШга маҳсулотлар олиб кириб, маҳаллий ишлаб чиқарувчиларнинг позицияларига зарар етказаётганини маълум қилди. Шу билан бирга, АҚШда Хитойни юань курсини пасайтирган ҳолда адолатсиз рақобатни ушлаб турганликда айблади. Натижада 2018 йилдан Вашингтон Хитой маҳсулотларига бир қатор божларни киритди, Хитой ҳам худди шундай жавоб қайтарди.

Айни вақтда АҚШ Трамп ҳукмронлиги даврида Хитойни технологияларни ўғирлашда фаол айблай бошлади. Хусусан, Хитойнинг Huawei компанияси шундай айбловларга дуч келди, 2019 йил майидан буён у миллий хавфсизликка таҳдид сифатида Америка санкциявий қора рўйхатига киритилган.

Бундан ташқари, Трамп Хитойнинг COVID-19 коронавирус инфекцияси пайдо бўлиши ва тарқалиши учун жавобгар эканини кўп бора таъкидлаган. Хусусан, у БМТга мурожаат қилиб, коронавирус келиб чиққани учун Пекинни жазолашни талаб қилган.

Дональд Трамп Хитойни коронавирус тарқатишда кўп бора айблаган. Чунончи, у Twitter’даги видеомурожаатида Хитойга коронавирус тарқатганлиги қимматга тушишини айтганди. Хитой эса коронавирусга қарши АҚШнинг барча айбловларини рад этиб, уларни асоссиз деб атаган эди.