Boeing авиасозлик корпорацияси АҚШда Pratt & Whitney 4000-112 двигателларидан бири рейс чоғида ёниб кетгани сабаб бошланган текширув вақтида шундай двигателлар ўрнатилган 777 лайнерларининг парвозларини тўхтатиб туришни тавсия қилди, деб ёзади «РБК».
«Транспортдаги хавфсизлик бўйича Миллий кенгаш суриштируви давом этаётган пайтда биз Pratt & Whitney 4000-112 двигателлари ўрнатилган фойдаланишда бўлган 69 та ва тураргоҳдаги 59 та 777 самолётларидан фойдаланишни тўхтатиб туришни тавсия қилдик, Фуқаролик авиацияси федерал бошқармаси текширувнинг тегишли протоколини аниқламагунига қадар», — дейилади баёнотда.
Эслатиб ўтамиз, 21 февраль куни United Airlines авиакомпаниясининг йўловчи самолёти парвоз пайтида двигателларидан бири ёниб кетганлиги сабабли АҚШнинг Колорадо аэропорти Денвер шаҳрига фавқулодда қўнди. Бортида 231 нафар йўловчи ва ўн нафар экипаж аъзолари бўлган Boeing 777 самолёти Денвердан 20 февраль куни Гонолулуга учган. Орадан вақт ўтиб, самолёт двигателларидан бирида ёнғин чиққан. Экипаж зудлик билан учиш аэропортига қайтишга қарор қилган. Қўниш пайтида самолёт двигатели қопламасининг бир қисми узилиб, Брумфилд шаҳридаги турар жой бинолари ҳовлисига тушган.
АҚШ Фуқаролик авиацияси федерал бошқармаси ҳодиса юзасидан суриштирув бошлади. Муассаса раҳбари Стив Диксоннинг сўзларига кўра, унинг натижаларига кўра баъзи самолётлар фойдаланишдан чиқарилиши мумкин.
Японияда эса ҳукумат текширув натижаларини кутмасдан, Pratt & Whitney 4000-112 двигателларига эга Boeing 777 парвозларини вақтинчалик тақиқлашга қарор қилди. Ўз навбатида, United Airlines авиакомпанияси ҳам Pratt & Whitney 4000-112 серияли двигателларга эга Boeing 777 ланерлари парвозини вақтинчалик тўхтатиб қўйди.
Изоҳ (0)