АҚШда 498,8 минг киши коронавирус қурбонига айланди, деб ёзади «РБК» Жонс Ҳопкинс университети маълумотларига таяниб. Бу мамлакатнинг Биринчи ва Иккинчи жаҳон урушлари ва Вьетнамдаги урушда кўрган ҳарбий талафотлардан ҳам кўпроқдир.
АҚШ Фахрийлар масалалари бўйича вазирлиги маълумотларига кўра, Биринчи жаҳон уруши йилларида 53,4 минг, Иккинчи жаҳон урушида 291,5 минг, Вьетнамдаги урушда эса 47,4 минг америкалик ҳарбий ҳалок бўлган.
Коронавирусдан энг кўп ўлим қайд этилган мамлакатлар учлигига Бразилия (246,5 минг киши) ва Мексика (179,7 минг киши) ҳам кирди. Россияда эса, тезкор штаб маълумотларига кўра, 83,2 минг кишининг ўлимида коронавирус асосий сабаб бўлиб хизмат қилган.
АҚШ коронавирусни юқтириб олганлар ва унинг оқибатида вафот этганлар сони бўйича етакчи бўлиб қолмоқда. Пандемия бошидан буён у ерда 28,1 миллион киши COVID-19’га чалинган. Бир кеча-кундуздаги максимал ўсиш 2 январь куни қайд этилган — ўша куни қарийб 300 минг киши касалланган. 19 февралга келиб, кўрсаткич 106,3 минг кишигача тушган.
1 февралдан АҚШда жамоат транспортида, аэропортларда ва вокзалларда мажбурий ниқоб режими амал қилмоқда. Декабрь ўрталаридан коронавирусга қарши оммавий эмлаш бошланган.
Изоҳ (0)