Австралияда 21 февралда коронавирусга қарши оммавий эмлаш бошланди. Бу ҳақда мамлакат соғлиқни сақлаш вазири Грег Хант АBC канали эфирида маълум қилди, деб ёзмоқда «Korrespondent.net».
Унинг сўзларига кўра, COVID-19’ га қарши биринчилардан бўлиб бош вазир Скотт Моррисон, бош санитар шифокор Пол Келли ва ҳамширалар хизмати бошлиғи Элисон Макмиллан эмланган. Эмлаш учун АҚШ ва Германия компаниясининг Pfizer/BioNTech вакцинасидан фойдаланилган.
«Бугун икки нафар фахрий, қариялар уйининг бир неча ходими, илғор бўғин ишчиларидан иборат биринчи гуруҳ эмланади, — деб қўшимча қилган соғлиқни сақлаш вазири.
Режага кўра, Австралияда аҳолини эмлаш бўйича асосий дастур 22 февралда бошланади. Дастлабки ҳафтада ҳукумат мамлакатнинг 190 шаҳрида 60 мингга яқин кишини эмлаш ниятида.
Умуман олганда, Австралия раҳбарияти 150 миллион доза вакцина олиш бўйича шартномалар имзолаган: AstraZeneca вакцинасидан 53,8 миллион доза, Novavax’дан 51 миллион доза, Pfizer/ BioNTech вакцинасидан 20 миллион доза ва COVAX дастури бўйича бошқа ишлаб чиқарувчилардан 25 миллион доза вакцина.
Аввалроқ Зимбабведа Хитойнинг Sinovac компанияси томонидан ишлаб чиқилган коронавирусга қарши вакцина билан эмлаш бошлангани, Венесуэлада аҳолини «Спутник V» вакцинаси билан эмлаш бошлангани, Перу аҳолиси Sinopharm вакцинаси билан эмланаётгани, Бангладешда ҳам коронавирусга қарши оммавий эмлаш бошлангани ҳақида хабар берилган эди.
Изоҳ (0)