Ер эгасининг розилиги олинмаган, ижарачи билан келишилмаган, тегишли халқ депутатлари кенгашларининг қарори ёки ҳукумат қарори чиқарилмаган, Адлия органларининг ижобий хулосаси олинмаган, келишувлар нотариал тасдиқланмаган қарорлар энг кўп Андижон вилоятида қабул қилинган. Бу ҳақда АОКАда ўтказилган брифингда Бош прокуратура бошқарма прокурори Абдураҳим Муҳиддинов маълум қилди.
Ноқонуний қарорлар Андижонда (48 та), Тошкентда (11 та), Наманганда (7 та), Жиззахда (6 та), Қорақалпоғистонда (4 та), Бухорода (3 та) ва Қашқадарёда (1 та) қабул қилинган.
Бунинг оқибатида, республика бўйича 1 338 та ҳолатда мулк эгаларидан 221,5 миллиард сўм қарздорлик юзага келиб, уларнинг ҳуқуқ ва манфаатлари бузилишига йўл қўйилган.
Таъкидланишича, маҳаллий ҳокимликларнинг ҳисобидаги жамғармада қолдиқ маблағлар мавжуд бўлса-да, Тошкент шаҳрида 76,4 миллиард сўм, Тошкент вилоятида 49 миллиард сўм, Сирдарёда 51 миллиард сўм, Қашқадарёда 17 миллиард сўм, Сурхондарёда 9,7 миллиард сўм, Жиззахда 7 миллиард сўм, Самарқандда 5 миллиард сўм, Фарғонада 2,4 миллиард сўм ва Андижонда 2 миллиард сўм қарздорлик қопланмаган.
Бундан аввал Ўзбекистонда ўзбошимча ва ноқонуний қурилган бинолар эгаси эндиликда жавобгарликка тортилиши мумкинлиги, Тошкент ҳокими 2021 йил охиригача «снос»лар бўйича барча қарзларни тўлашга ваъда бергани ҳамда Расул Кушербаев «снос»лар билан боғлиқ муаммоларни ечиш учун мораторий эълон қилишни таклиф этгани ҳақида хабар берилганди.
Изоҳ (0)