«Мовий гумбазлар» ресторани яқинидаги хиёбонда Тошкент шаҳар ҳокими Жаҳонгир Ортиқхўжаевнинг жамоатчилик вакиллари билан Ўзбекистон мустақиллигининг 30 йиллигига бағишлаб «Истиқлол» мажмуасини барпо этиш масаласига оид учрашуви бошланди. Бу ҳақда пойтахт ҳокимлиги матбуот хизмати хабар берди.
Маълум қилинишича, «Истиқлол» мажмуаси мустақилликнинг рамзини акс эттирувчи стела барпо этилишини кўзда тутади, бошқа ҳеч қандай қурилиш иншоотлари бўлмайди.
«Фақат шу жойда ишлар олиб борилади. Стела атрофи ободонлаштирилади, қолган хиёбон ҳудудининг бир метрига ҳам тегилмайди. Биронта дарахтга тегилмайди», — дейилади хабарда.
Учрашувда иштирок этган «Дарё» мухбирининг маълум қилишича, боғ ҳудудига қўшимча дарахтлар экилади ва у ер ҳимояга олинади, 100—200 йиллаб ҳимояда бўлади.
«Агар бу ерда ўша мажмуа қурилса, 100 йиллар давомида бу боғга ҳеч ким тегмайди. Мен ҳозир шаҳар ҳокимиман. Бу боғни сақлаб қолишим мумкин. Аммо мен кетганимдан кейин келадиган ҳоким бу жойни меҳмонхона қурилишига бериб юборади. Шунинг учун мустақиллик рамзи шу ерда қурилиши керак. Агар боғдаги бир дона дарахт кесилса, мен ўша куниёқ ариза ёзиб лавозимимдан кетаман», — дея таъкидлаган пойтахт ҳокими.
Эслатиб ўтамиз, 4 февраль куни Тошкент шаҳар ҳокимлиги Ўзбекистон мустақиллигининг 30 йиллигига бағишланган «Истиқлол» мажмуаси концепцияси лойиҳасини яратиш учун танлов эълон қилди. Таклиф жамоатчиликнинг кенг эътирозларига сабаб бўлган. Янгиликлар остидаги изоҳларда фойдаланувчилар пойтахтдаги кам сонли яшил ҳудудлардан бирига тегинмасликни, бу ерга шаҳарнинг турли бурчакларидан одамлар дам олиш учун келишини таъкидламоқда. Сквер яқинда, 2018 йилнинг баҳорида, ободонлаштирилган эди.
Изоҳ (0)