Тошкент шаҳар ҳокими Жаҳонгир Ортиқхўжаев 13 февраль куни «Истиқлол» мажмуасининг қурилиши масаласида жамоатчилик вакиллари билан учрашди.
«Дарё» мухбири Мусулмонбек Иброҳимовнинг хабар беришича, учрашувда фуқаролардан бири «Истиқлол» мажмуасини барпо этишда жамоатчилик фикри ҳисобга олинмаслиги мумкинлиги, шаҳарда ҳеч ким билан ҳисоблашмай бўлаётган қурилишлар кўпчиликда шаҳар ҳокимлигига ишончсизлик уйғотаётганини айтиб ўтди. Бунга жавобан Жаҳонгир Ортиқхўжаев шаҳардаги битта сифатсиз қурилган бинони буздириб ташлаганида аксарият ОАВ ва блогерлар унга қарши чиққанини айтиб ўтди.
«Икки йил аввал Муҳаммадбобур деган тадбиркоримиз Мирзо Улуғбек туманида ўзбошимчалик билан қулаб кетадиган уй қурган эди. Ноқонуний, сифатсиз қургани, одамларнинг ҳаёти билан боғлиқ бўлгани учун мен бориб ўша уйни буздириб ташлаганман. Ўшанда аксарият ОАВ ва блогерлар ‘Сен тадбиркорни жойини буздинг’, деб менга қарши чиққанди. Кейин мен қурса-қурақолсин дедим. Бунинг оқибатида нима бўлди, шаҳарда ҳамма шу ишни қилишни бошлади. Ўшанда ОАВ мени қўллаб-қувватлаганида эди, шу ишлар бўлмас эди», — деди шаҳар ҳокими.
Пойтахт раҳбари агар унинг ишидан халқ сайлаган депутатлар рози бўлмаётган бўлса, лавозимини тарк этишга тайёр эканлигини қўшимча қилди.
«Мени 60 та депутат сайлаган. У депутатларни эса 20—25 минг нафар халқ сайлаган, улар ҳам халқ вакиллари. Агар ўша депутатлар мени ишдан олиб ташлашса, лавозимимдан кетишга розиман. Мен ўз ваколатимдан чиқиб кетаётганим йўқ», — деди Жаҳонгир Ортиқхўжаев.
Аввалроқ Жаҳонгир Ортиқхўжаев «Истиқлол» мажмуасини барпо этиш масаласи юзасидан аҳоли билан учрашгани ва боғдаги бир дона дарахт кесилса, ўша куниёқ лавозимидан кетишга тайёрлигини маълум қилган эди.
Эслатиб ўтамиз, 4 февраль куни Тошкент шаҳар ҳокимлиги Ўзбекистон мустақиллигининг 30 йиллигига бағишланган «Истиқлол» мажмуаси концепцияси лойиҳасини яратиш учун танлов эълон қилди. Таклиф жамоатчиликнинг кенг эътирозларига сабаб бўлган. Янгиликлар остидаги изоҳларда фойдаланувчилар пойтахтдаги кам сонли яшил ҳудудлардан бирига тегинмасликни, бу ерга шаҳарнинг турли бурчакларидан одамлар дам олиш учун келишини таъкидлаган.
Маълумот учун, Тошкент шаҳар ҳокими Жаҳонгир Ортиқхўжаев 2019 йил 27 апрель куни шаҳар ҳокимлиги биносида инвестор Муҳаммадбобур Хўжаев ва унинг шериги, хусусий қурувчи Азиз Зокиров билан мулоқот ўтказганди. Унда Муҳаммадбобур Хўжаевга ўзига тегишли Риштон кўчасидаги 106-уйнинг бузилиши натижасида 600 киши ишсиз қолиб, тадбиркор 1,35 миллион доллар зарар кўргани бўйича масалалар ўртага ташланиб, икки томон музокара олиб борган.
Изоҳ (0)