Қашқадарё вилоятида Damas ҳайдовчисига куч ишлатган транспорт бошқармаси ходими ишдан олинди. Бу ҳақда Транспорт бошқармаси ахборот хизмати маълум қилди.
Хабар берилишича, ижтимоий тармоқларда транспорт бошқармаси ходими ва ҳайдовчи мулоқоти акс этган видео тарқалган. Мазкур видеода транспорт бошқармаси ходимининг ҳайдовчига қўпол муносабатда бўлиб, унинг бошини қўли билан эгиб, куч ишлатганини кўриш мумкин.
Видеодан англашилишича, ЙПХ ходими билан биргаликда ўз хизмат вазифасини бажараётган транспорт бошқармаси ходими Лазиз исмли Damas ҳайдовчисини тўхтатиб, олиб кетаётган йўловчиларининг кимлиги билан қизиққан. Ҳамда ҳайдовчининг лицензиясиз одам ташиётганини тахмин қилган.
Видеодан, шунингдек, ҳайдовчининг «булар қариндошларим», деган овози эшитилади. Нотаниш овоз соҳиби эса ҳайдовчига «Агар шулар қариндошларингиз бўлмаса, Худо урсинми, Ҳазрати Довуд пир урсинми?», дея қасам ичишга мажбурлайди.
«Воқеа 2021 йил 30 январь куни Яккабоғ туманида содир бўлган. Ҳолат юзасидан бошқарма томонидан ўрганиш ташкил этилди. Видеолавҳада акс этган вазият ўз хизмат ваколатларидан четга чиқиш, дея баҳоланди. Хизмат вақтида ножўя хатти-ҳаракатни амалга оширгани учун ходим Б.М.га кескин чора кўрилди, у бошқарма бошлиғининг буйруғи билан эгаллаб турган вазифасидан озод этилди», — дейилади бошқарма ахборот хизмати маълумотида.
Бошқарма ахборот хизматининг қайд этишича, бошқарма раҳбарияти томонидан ходимларга хизмат йўриқномасига қатъий риоя қилиши лозимлиги мунтазам тушунтириб борилади.
Мавзуга доир:
- Қашқадарёда Damas ҳайдовчилари одам ташишга рухсат берилмагани сабаб 150 нафар киши ишсиз қолганини айтди. Транспорт бошқармаси масъули бунга изоҳ берди
- Ҳайдовчи киракашлик қилганини тан олди, транспорт бошқармаси ходими эса ҳайдовчидан узр сўради. Интернетда тарқалган видео тафсилотлари маълум бўлди
Изоҳ (0)