«Auto.ru» сайтида 1937 йилда ишлаб чиқарилган ноёб Opel Olympia сотувга қўйилгани тўғрисида эълон пайдо бўлди. Москвада сақланаётган кумушранг икки эшикли машина 999 минг рублга (13 минг доллар) баҳоланмоқда, деб ёзади Motor.
Эълонда кўрсатилишича, автомобиль хусусий коллекционерга тегишли. Суратларга кўра, немис седанининг кузови яхши аҳволда сақланган. Olympia салони суратга кўринмаган: ойналар орқали фақат оригинал руль чамбарагини кўриш мумкин. Сотувчининг сўзларига кўра, Opel’га ҳозирга қадар икки киши эгалик қилган. Таъкидланишича, автомобиль «растоможка»дан ўтган, таъмирталаб эмас ва оригинал автомобиль паспортига эга.
Olympia модели 44 от кучига эга 1,5 литрли бензин мотор ёрдамида ҳаракатга келади. Двигатель механик узатмалар қутиси ёрдамида ишлайди. Орқа узатмали икки эшикли модель ҳозирга қадар 50 минг километр йўл босган.
Opel Olympia 1936 йили Берлинда ўтказилган Олимпиада шарафига номланган. У монокок кузовга эга Германиядаги биринчи серияли автомобиль ҳисобланади. Ягона пўлат конструкция машина оғирлигини бошқа ромли моделларга қараганда 150 килограммга енгиллаштириш имконини берган.
Olympia’ни ишлаб чиқариш 1935 йилда бошланган, бироқ Иккинчи жаҳон уруши бошланишида немис армиясининг эҳтиёжлари сабаб тўхтатилган. Бундан ташқари, уруш давомида Рюсселсхаймдаги Opel фабрикасига жиддий шикаст етган. Ишлаб чиқариш 1947 йилга бориб қайта тикланган ва 1953 йилга қадар давом этган. Бироқ эскирган модель янги Rekord’га алмаштирилган. Olympia номи 1967 йилга қайта тикланган, аммо фақат уч йилга: 1970 йилда Opel линейкасидаги автомобиль ўрнини Ascona эгаллаган.
Аввалроқ Нидерландияда Муаммар Каддафи буюртмасига асосан яратилгани айтилаётган Maybach 57S, америкалик баскетболчи Коби Брайантга тегишли бўлган Chevrolet Impala, 20 йил давомида гаражда қолиб кетган ноёб BMW М1 сотувга қўйилгани тўғрисида хабар берилганди.
Изоҳ (0)