Bring a Trailer аукционида 1952 йилда ишлаб чиқарилган қора Mercedes-Benz 220 Cabriolet А сотувга қўйилди. Савдолар вақтида бутун «умри» давомида бир кишига хизмат кўрсатган ноёб модель нархи 64,5 минг долларга етган, деб хабар беради Motor.
Mercedes-Benz 220 Cabriolet А биринчи бор 1951 йилининг апрелида Франкфуртдаги халқаро автомобиль кўргазмасида намойиш этилган. Тўрт йил давомида компания асосий хусусияти қанотларга интеграциялашган олд фаралари, шунингдек, ҳаракат йўналишига қарши очиладиган эшикларга эга моделдан 1300 та нусха ишлаб чиқарган. Модель Cabriolet B’дан кузов линияларининг силлиқлиги ва салонининг кенглиги билан ажралиб туради.
Сотувга қўйилган нусха 1952 йилда ишлаб чиқарилган. Кабриолет тақдим этилганидан 7 йил ўтиб, уни ҳозирги эгаси сотиб олган ва ҳозирга қадар ундан фойдаланиб келган. 62 йил давомида эркак ушбу машинада 49 минг километр йўл босган. Кузовидаги айрим деталлар таъмирлангани ҳисобга олинмаса, йиғма томга эга Mercedes-Benz яхши ҳолатда сақланган. Кабриолетнинг барча агрегатлари соз ҳолатда.
Автомобиль салони жигарранг чарм ва табиий ёғочлар билан қопланган. Mercedes жамланмасидан «радиоприёмник», шунингдек, фирма чамадонлари жамланмаси ўрин олган. Ноёб модель капоти остида 80 от кучига эга 2,2 литрли В6 ўрин олган бўлиб, у тўрт поғонали механик узатмалар қутиси ёрдамида бошқарилади.
Аввалроқ Нидерландияда Муаммар Каддафи буюртмасига асосан яратилгани айтилаётган Maybach 57S сотувга қўйилгани тўғрисида хабар берилганди.
Мавзуга доир:
Изоҳ (0)