Корея Республикаси ҳукумати Ой тақвими бўйича Янги йилни нишонлаш арафасида ва байрам кунлари оммавий равишда коронавирусни юқтириш хавфи муносабати билан ижтимоий масофани сақлаш бўйича қатъий чораларни 14 февралга қадар узайтириш тўғрисида қарор қабул қилди, деб ёзмоқда «ТАСС».
Ҳозирда Жанубий Кореянинг пойтахт минтақасида ижтимоий масофа сақлашнинг беш балли даражасидан тўртинчи даражасига амал қилиш мажбурий этилган. Бошқа ҳудудларда бу даража уч балл этиб белгиланган. Сеул, Кёнгги вилояти ва Инчхон шаҳрида тўрт кишидан кўп одамнинг йиғилиши тақиқ остида турибди. Умумий овқатланиш шохобчалари ташриф буюрувчиларни соат 21:00 гача қабул қилади. Белгиланган вақтдан кейин улар етказиб бериш ёки олиб кетиш режимида ишлаши мумкин. Черковлар онлайн режимда ишлайди, фақат якшанба кунлари тўлиқ кунлик хизматлар ҳамда 10% дан кўп бўлмаган жойни банд қилишга рухсат берилади. Барлар ва тунги клублар фаолиятига тақиқ сақланиб қолмоқда.
Ўтган бир кеча-кундузда Корея Республикасида коронавирусга чалиниш бўйича 305 та янги ҳолат қайд этилди. Пандемия бошланганидан бери вирус юқтирганларнинг умумий сони 78 508 кишини ташкил этди, жами 68 309 нафар бемор тузалди.
2020 йилнинг декабрь ойида Жанубий Кореяда коронавируснинг учинчи тўлқини кузатилаётгани муносабати билан янги чекловлар жорий қилинганди. 2021 йил 11 январь куни давлат раҳбари Мун Чже Ин мамлакатнинг барча фуқаролари коронавирусга қарши бепул эмланишини ва бу жараён келаси ойдан бошланишини эълон қилган.
Изоҳ (0)