Президент Шавкат Мирзиёев раислигида 27 январь, чоршанба куни ўтказилган йиғилишда давлат раҳбари иқтидорли ёшларни кашф қилиш, уларнинг ташаббус ва интилишларини ҳар томонлама қўллаб-қувватлаш мақсадида ҳар бир вилоятда «Ўзбекистон учун 100 ғоя» лойиҳасини амалга ошириш зарурлигини билдирди, дея хабар бермоқда «Дарё» мухбири.
«Лойиҳа доирасида ёшларнинг иқтисодиёт, таълим, соғлиқни сақлаш каби соҳалар бўйича инновацион ғояларини рўёбга чиқариш учун зарур шарт-шароитлар яратиш лозим.
Мисол учун, қашқадарёлик ёш тадбиркор Сардор Содиқов пандемия туфайли барча ўқув марказлари ўз фаолиятини тўхтатган бир пайтда, инглиз тилини ўргатишнинг мобил дастурини яратиб, минглаб ёшлар учун масофавий таълимни йўлга қўйди. Қолаверса, ушбу дастурни интернет орқали хорижга ҳам экспорт қилмоқда. Бундай инновацион ғоялар менга жуда маъқул келяпти.
Ҳар бир вилоятдан 100 тадан ғоя келиб тушса, Ўзбекистон бўйича жами 1 минг 400 та ғоя бўлади. 100 тадан ҳеч бўлмаганда 10 таси иқтисодий жиҳатдан барқарор бўлиб, албатта, мамлакат иқтисодиётига татбиқ этилади», — деди давлат раҳбари.
Президент бош вазир ўринбосари Беҳзод Мусаев, Ёшлар ишлари агентлиги раҳбари Алишер Саъдуллаев ва вилоят ҳокимларига бир ой муддатда қобилиятли ёшларни аниқлаш, уларнинг илғор ғояларини қўллаб-қувватлашга қаратилган тизим яратиш бўйича топшириқ берди.
Мавзуга доир:
- «2021 йилда 500 минг нафар ўқувчи ва 100 минг нафар талабани ички туризмга жалб қиламиз» – Шавкат Мирзиёев
- Шавкат Мирзиёев: «‘Ёшлар дафтари’га кирган 100 минг нафар йигит-қиз ҳафталик ўқув курсларида ўқитилади»
- Шавкат Мирзиёев таниқли ва муваффақиятга эришган спортчиларни мактабларга бириктириш бўйича топшириқ берди
Изоҳ (0)