Tesla ўз тарихида илк бор йиллик фойда олганини маълум қилди. Аммо компания акциялари кескин пасайиб кетди

Электромобиллар ишлаб чиқарувчи Tesla компанияси 2020 йилнинг тўртинчи чорагида 270 миллион, йил давомида эса жами 721 миллион доллар соф фойда кўрганини маълум қилди, деб ёзмоқда Meduza.

Tesla ўз тарихида биринчи марта йил давомида зарар кўрмади. Таққослаш учун, компания 2019 йилда 862 миллион доллар миқдорида соф зарарни қайд этган.

2019 йилнинг тўртинчи чорагида компаниянинг даромади 10,74 миллиард долларни ташкил этган. Бутун йил давомидаги жами тушуми 31,5 миллиард доллар бўлган.

Бироқ хабарга кўра, 2020 йилнинг тўртинчи чорагидаги натижалар инвесторларнинг умидини оқламади, бундан ташқари, компания 2021 йил учун автомобилларни етказиб бериш бўйича аниқ мақсадни тақдим этмади.

Оқибатда Tesla акциялари 5 фоизга тушди ва Tesla асосчиси Илон Маскнинг бойлиги — Forbes маълумотларига кўра — 3,7 миллиард долларга камайиб, 186,6 миллиард долларни ташкил қилди, Bloomberg рейтингига кўра — 4,3 миллиард долларга камайиб, 206 миллиард долларга тенг бўлди.

Сўнгги 12 ой ичида Tesla акциялари деярли 700 фоизга ўсди ва Илон Маск бир мунча вақт сайёрамизнинг энг бой одамига айланди.

Маск дунёдаги энг бой одамлар рўйхатида Безосни ортда қолдиргандан сўнг у ўзининг Twitter’даги саҳифасида маҳкамланган постни ўзгартириб, 2018 йилда ўз бойлигининг ярмини Марсда шаҳар қуришга йўналтиришга ваъда берган постини қайта жойлаган. Маскнинг ўзи Марсни мустамлака қилиш учун барча мол-мулкини сотишга қарор қилганини айтган. «Аслида, менда компаниянинг акцияларидан ташқари пул қийматидаги мулким деярли қолмайди», — деган у. Аввалроқ Маск 2050 йилга қадар Марсда 1 миллион аҳолиси бўлган шаҳар қуришни режалаштирганини айтганди.