Россия ТИВ АҚШ дипломатига «Россия ҳақида ёлғон маълумотлар тарқатганлик» учун норозилик нотасини топширди

АҚШнинг Москвадаги элчихонаси вакилига Америка ижтимоий тармоқларида Россия ҳақида ишончсиз маълумотлар тарқатилиши юзасидан норозилик нотасини топширилди, деб ёзади Meduza Россия Ташқи ишлар вазирлигига таяниб.

«Америка рақамли платформалари томонидан Россия ҳақида катта кўламда ишончсиз ‘фейклар’ тарқалганини қайд этамиз, улар ўз навбатида, Москвадаги АҚШ элчихонаси билан мувофиқлаштирилган ҳолда тарқатилувчи гижгижловчи мазмунга эга ахборотни мунтазам равишда кўпайтириб келади», — дейилади ТИВ хабарида.

Вазирлик қўшимча қилишича, 27 январь куни Федерация кенгаши томонидан қабул қилинган баёнотни қўллаб-қувватлайди. Унда кенгаш Америка интернет компанияларини сўз эркинлигини чеклашда айблаган ва дунё мамлакатларини энг йирик ижтимоий тармоқларнинг «чексиз қудрати ва ўзбошимчалигини чеклаш учун» миллий қонунчиликни ишлаб чиқишга чақирган эди.

«АҚШдаги президент сайловларидан кейинги воқеалар ривожи Америка интернет-гигантлари цензурани кенг қўллаш, шунингдек, муқобил платформаларни ноқонуний блоклаш йўлидан кетганини кўрсатди», — дейилади Федерал кенгаш баёнотида.

Россия ҳукумати Кремлпараст ОАВларнинг блокланиши туфайли энг йирик ижтимоий тармоқлар томонидан бўлаётган цензурадан кўп марта шикоят қилган. 2020 йил охирида Россияда «Роскомнадзор»га интернет-ресурсларни Россия ОАВларига нисбатан дискриминация учун блоклаш имконини берувчи қонун қабул қилинди.

Январь бошида Twitter ўша вақтда АҚШ президенти бўлган Дональд Трамп аккаунтини бутунлай блоклаб қўйди. Бу Трамп митинг чоғида ўз тарафдорларини Капитолийга боришга даъват қилганидан кейин юз берди; намойиш Капитолийга шиддатли ҳужум билан якунланди. Twitter раҳбари Жек Дорси Трамп аккаунтининг блокланиши туфайли цензурада айбланди. Дорси бу хавфли прецедент яратган бўлса-да, тўғри қарор бўлганини айтди.

Бир неча кун аввал Россия ТИВ АҚШ дипломатик миссияси ижтимоий тармоқларида 23 январдаги Алексей Навальний тарафдорларининг акциялари ҳақидаги хабарлар сабабли АҚШ элчисига норозилик билдирган эди. АҚШ элчихонаси бунга жавобан Америка фуқароларини уларнинг хавфсизлигига нисбатан потенциал таҳдидлар ҳақида ахборот беришга мажбур эканлигини билдирди.