Дунёнинг собиқ энг бадавлат кишиси Карлос Слим коронавирус билан касалхонага ётқизилди

Коронавирусга чалинган мексикалик миллиардер Карлос Слим касалхонага ётқизилди. Бу ҳақда тадбиркорнинг расмий вакили ва куёви Артуро Элиас маълум қилди, деб ёзмоқда «РБК».

Вакилнинг сўзларига кўра, Слим ўзини жуда яхши ҳис қилмоқда. У даволаниш мобайнида соғлиғини назорат қилиш учун касалхонага ётқизилган.

Слим 28 январь куни 81 ёшга тўлади. У касби бўйича муҳандис ҳамда Мексикадаги энг бой одам. 2010 йилда Слим Forbes журналининг миллиардерлари рўйхатида Microsoft асосчиси Билл Гейтсни ортда қолдириб, дунёдаги энг бой одамига айланганди. Слим 2013 йилгача мазкур рейтингда биринчи ўринни эгаллаб келган.

Ҳозирда Forbes журнали рейтингида Слим 21-ўринни эгаллаб турибди. Газетанинг ёзишича, бизнесменнинг бойлиги 58,7 миллиард долларга баҳоланган. Слимнинг коронавирус билан касалланганлиги ҳақидаги хабарлар тарқалгач, унинг бойлиги 893 миллион доллар (1,5 %)га камайди.

Слим Мексиканинг йирик Telmex ва América Móvil телекоммуникацион компанияларига, шунингдек, ресторан ва универсал дўконларга эгалик қилади. Шу билан бирга тадбиркор хайрия ишларида ҳам фаол иштирок этади. У мамлакатдаги таълим, маданий ва тиббий лойиҳаларни молиялаштирадиган Карлос Слим хайрия фондини ташкил этган.

Хабарга кўра, фонд 2019 йил ёзида коронавирусга қарши вакцина ишлаб чиқарадиган AstraZeneca фармацевтика компанияси билан шартнома тузган.

Битим шартларига кўра, AstraZeneca вакцинани Аргентинада ишлаб чиқаради, Мексиканинг Liomont фармацевтика компанияси препаратни ишлаб чиқаришнинг сўнгги босқичлари ва қадоқлаш учун жавобгардир. Препаратни сотиб олиш ва ишлаб чиқариш учун маблағ Слим фонди томонидан ажратилган. 5 январь куни Мексика AstraZeneca вакцинасини фавқулодда вазиятларда қўллашни маъқуллади.

Жонс Ҳопкинс университети маълумотларига кўра, Мексикада пандемия бошланганидан бери 1,78 миллион киши коронавирус билан касалланган. Касалликдан вафот этганлар сони бўйича мамлакат дунёда АҚШ (427 минг), Бразилия (218,8 минг) ва Ҳиндистондан (153,7 минг) кейин тўртинчи ўринда туради. Мексикада 153 минг киши касаллик қурбонига айланган.