Давлат статистика қўмитаси Ўзбекистоннинг 2020 йил якунлари бўйича демографик ҳолатига доир рақамларни эълон қилди. Эълон қилинган маълумотлар орасида умумий ўлим ҳолатларга доир статистика ҳам бор (аввалроқ қўмита бундай статистика 2021 йил январь ойи охиригача эълон қилинишини билдирган эди).
Йиллик умумий ўлимлар сони.
Диаграмма: Давлат статистика қўмитаси
Унга кўра, Ўзбекистонда 2020 йилда 175,6 мигта ўлим қайд этилган бўлиб, ҳар 1000 аҳолига ўлим коэффициенти 5,1 промиллени ташкил этган ва 2019 йилга нисбатан 0,5 промиллега ошган (2019 йилнинг январь—декабрь ойларида кўрсаткич 4,6 промилле бўлган).
2020 йилда қайд этилган ўлим ҳолатларининг 60,0 фоизи қон айланиш тизими касалликларидан, 8,0 фоизи ўсимталардан, 7,2 фоизи нафас олиш аъзолари касалликларидан, 4,4 фоизи овқат ҳзм қилиш аъзолари касалликларидан, 4,4 фоизи бахтсиз ҳодиса, заҳарланиш ва жароҳатланишлардан, 4,4 фоизи юқумли ва паразитар касалликлардан ҳамда 11,6 фоизи бошқа касалликлардан вафот этган.
2020 йилги ўлим ҳолатлари сони бундан аввалги сўнгги беш йилликдаги ўртача кўрсаткичдан 13 фоизга (ўртача 20 мингтага кўп). Таққослаш учун, Ўзбекистонда 2015 йилда 152,0 мингта, 2016 йилда 154,7 мингта, 2017 йилда 160,7 мингта, 2018 йилда 154,9 мингта, 2019 йилда 154,6 мингта ўлим ҳолати қайд этилган.
Ўзбекистонда 2020 йилда қайд этилган ўлимлар сони ҳудудлар кесимда.
Диаграмма: Давлат статистика қўмитаси
Ҳудудлар кесимида ҳам 2020 йилги ўлим ҳолатлари сони Андижон вилоятидан бошқа барча жойларда рекорд кўрсаткични қайд этган. Таққослаш учун, Тошкент шаҳрида ўтган йили 2019 йилга нисбатан 5,8 мингта, Тошкент вилоятида 2,4 мингта, Самарқанд вилоятида 2 мингта кўпроқ ўлим ҳолатлари қайд этилган.
Тошкент шаҳрида 2020 йилда 21,2 мингдан ортиқ ўлим қайд этилган — бу 2019 йилги кўрсаткичдан 5,8 мингтага кўп
Жадвал: «Дарё»
