Тошкент шаҳар ҳокими Жаҳонгир Ортиқхўжаевнинг меҳнат таътили баҳор фаслига кўчирилди

Тошкент шаҳар ҳокими Жаҳонгир Ортиқхўжаевнинг меҳнат таътили баҳор фаслига кўчирилди. Бу ҳақда пойтахт ҳокимлиги матбуот хизмати хабар берди.

17 январь куни Қорақалпоғистон Вазирлар Кенгаши раиси ва Тошкент шаҳри ҳокими билан биргаликда бешта вилоят раҳбари 10 кунлик меҳнат таътилига чиққани тўғрисида хабар берилганди. Хабарга кўра, 7 нафар раҳбар билан бир вақтда ушбу ҳудудларда фаолият юритувчи ҳоким ўринбосарлари, маслаҳатчилари ва сектор раҳбарларидан иборат 935 нафар масъул ҳам таътилга чиққан.

Аввалроқ 2021 йил 7 январь куни эса Қашқадарё ҳокими Зоир Мирзаев бошчилигидаги туман ва шаҳар ҳокимлари, шунингдек, вилоят ҳокимининг барча ўринбосарлари бирламчи тиббий кўрикдан ўтганди. Тиббий кўрик вилоят кўп тармоқли тиббиёт поликлиникасида амалга оширилганди.

Маълумот учун, Ўзбекистондаги амалдаги қонунчиликка кўра вилоят ҳокимлари ҳукумат қошидаги тиббиёт бош бошқармаси рўйхатида туради. Уларга зарур ҳолатларда тиббий диагностика қилиш, даволаш, умуман олганда, уларнинг саломатлигини муҳофаза қилиш мазкур бошқарма зиммасида.

Эслатиб ўтамиз, Президент Шавкат Мирзиёев ҳам 2021 йил 4 январдан қисқа муддатли меҳнат таътилига чиқиб,11 январда таътилдан қайтганди.